Ilan sa mga sikat na ilaw ng tahanan mula sa show business ang tatakbo sa mid-term elections sa susunod na taon.
Kahit abala sa pagiging ina sa kanilang pamilya at sa kanilang showbiz commitments, naisipan pa rin ng mga ito ang tumakbo upang makapagsilbi sa kanilang kababayan.
Una sa listahan ng celebrity moms na hangad na manalo sa susunod na eleksyon ay ang nagbabalik-pulitikang si Vilma Santos-Recto.
Gusto muling magserbisyo ng multi-awarded actress bilang governor ng Batangas, na pinamunan na rin niya noong 2007 hanggang 2016.
Hangad din ng dating TV host at model na si Lucy Torres-Gomez na ipagpatuloy niya ang programa bilang mayor ng Ormoc City sa susunod na tatlong taon kaya muli siyang naghain ng certificate of candidacy noong October 2.
Matatandaan na pinalitan ni Lucy bilang mayor ng Ormoc ang mister na si Richard Gomez, na re-electionist din sa 2025 bilang representative ng 4th district ng Leyte.
Kilalanin ang mga showbiz moms na lalaban sa Eleksyon 2025 sa gallery na ito!
Kung papalarin sa susunod na taon muling magsisilbi bilang gobernadora ng Batangas si Ate Vilma. Ang tinaguriang "Star for All Seasons" ang kauna-unahang babaeng governor ng probinsiya nang mahalal noong 2007.
Susubukang muli ng asawa ni incumbent Senator Bong Revilla na si Lani Mercado-Revilla na makuha ang boto ng mga kababayan niya sa second district ng Cavite sa 2025 elections.
Nakausporta ang buong pamilya ni Lucy Torres-Gomez nang maghain siya ng certificate of candidacy (COC) para sa muli niyang pagtakbo bilang Ormoc City mayor. Kasama niya ang asawa niyang si Leyte representative Richard Gomez at ang nag-iisa nilang anak na si Juliana.
Lalaban ang misis ni city councilor Jomari Yllana na si Abby Viduya para maging kinatawan ng first district ng Parañaque City sa konseho.
Si Abby, na ang dating screen name ay si Priscilla Almeda, ay ikinasal kay Jomari sa US noong November 2023. Siya ay may dalawang anak na babae sa dati niyang relasyon.
Sa 2025 elections, muling tatakbo si Angelu bilang city councilor sa Pasig City.
Happily married ang 'Pulang Araw' actress na si Angelu de Leon sa mister niyang si Wowie Rivera. May anak silang lalaki na ang pangalan ay Rafa. Samantala, si Nicole ay anak naman siya sa dating karelasyon na si Joko Diaz at si Louise naman ay supling niya kay Jojo Manlongat.
Nagbabalik-pulitika ang aktres na si Marjorie Barretto, na tatakbo sa mid-term elections para maging city councilor ng second district ng Caloocan. Dati nang nagsilbi sa parehong konseho ng s siyudad ang nanay ni Julia Barretto.
Bukod kay Julia, may apat pa na anak si Marjorie na sina Dani, Claudia, Leon, at Erich.
Kahit busy sa pag-aalaga ng kaniyang twins ang former Viva Hot Babe na si Jaycee Parker (o JC Parker), nais muli nitong maglingkod bilang city councilor sa Angeles City, Pampanga.. Isinilang ni Jaycee sina Celeste at Celina noong March 2024. Samantala, ang mister niya na si Jericho Aguas may anak na lalaki na si Hubert sa yumaong aktres na si Isabel Granada.
Second nominee si “Superstar” Nora Aunor ng People's Champ Party-List para sa eleksyon 2025. May limang anak ang award-winning showbiz icon sa dating karelasyon na si Christopher de Leon na sina Lotlot de Leon, Ian de Leon, Kiko Villamayor, Kenneth Villamayor, at Matet de Leon.
Nais ni Aiko Melendez na muling makapagsilbi sa mga mamamayan ng fifth district ng Quezon City, kaya pormal siyang naghain ng COC para sa pagtakbo bilang konsehala sa siyudad.
Ang celebrity mom ay may dalawang anak na sina Andre at Marthena.
Mula sa mundo ng pagandahan, susubukan naman ni Miss Universe 2011 3rd runner-up Shamcey Supsup na manalo sa city council. Pormal na naghain ang dating Miss Universe Philippines national director ng kaniyang certificate of candidacy para sa pagtakbo sa konseho ng Pasig City. May dalawang anak na si Shamcey sa kaniyang mister na si Lloyd Lee.
Tatakbo rin ang dating 'Bubble Gang' star na si Ara Mina para konsehal sa 2nd District ng Pasig city. Meron anak si Ara sa dating partner na si Bulakan, Bulacan Vice Mayor Patrick Meneses na pinangalanan nila na Amanda Gabrielle.
Mula sa pagiging parte ng isang political serye sa TV na 'First Yaya' at 'First Lady', ngayon in real-life na pagpasok sa pulitika ng showbiz mom na si Cai Cortez. Tatakbo si Cai sa 2025 elections bilang councilor sa Taytay, Rizal.