Kilala ngayon bilang isa sa mga pinakamainit na love team ang tambalan nina Dustin Yu at Bianca de Vera. At gaya ng maraming love teams, umaasa ang fans na tatawid sa real life ang relasyon ng dalawa.
Sa Fast Talk with Boy Abunda nitong Huwebes, July 16, inamin nina Dustin at Bianca na hindi naman nila nakita noong una ang isa't isa bilang ka-love team o potential na karelasyon. Sa katunayan, ayon sa aktres, kuya-kuya lang ang tingin niya noon sa aktor.
Ngunit kalaunan, nagbago umano ang tingin nila sa isa't isa hanggang sa na-develop ang dalawang aktor sa kung ano ang meron sila ngayon.
Alamin ang first impression nina Dustin at Bianca sa isa't isa at kung papaano ito nagbago sa gallery na ito:
Maituturing na isa sa mga pinakamainit na love team ngayon ang tambalan nina Dustin Yu at Bianca de Vera. Ngunit ayon sa dalawa, hindi naman ganoon ang naging simula nila.
Pagbabahagi ni Bianca de Vera, noong una ay kaibigan lang talaga ang tingin niya kay Dustin.
Sabi pa ni Bianca de Vera, "Kasi ganu'n naman talaga siya noong una, Tito Boy. Parang super platonic lang talaga and parang super cool lang with the both of us."
Nagkaroon umano ng pagbabago sa tingin ni Bianca de Vera kay Dustin Yu noong nag-lead ang aktor sa isang task sa loob ng Bahay ni Kuya. Sabi ng aktres, nakita niya ang maturity ng aktor sa task. "I honestly thought he was older than me, like 28 or 30, kasi sobrang mature niya. Ta's kinuwento niya sa 'kin 'yung buhay niya. Sabi ko, 'Grabe, ang galing.' Sobrang bilib ako sa kaniya."
Kung si Bianca de Vera, kaibigan lang ang tingin kay Dustin Yu noong una, malayo naman dito ang first impression ng aktor. Pagbabahagi niya, "Impression ko sa kaniya, honestly, lagi kong sinasabi sa sarili ko at saka sa mga kaibigan ko sa loob ng Bahay ni Kuya na 'Ibang tao si Bianca, no? Parang bagong-bago siya sa 'kin.' 'Yung personality niya."
Pag-amin ni Dustin Yu, na-attract kaagad siya kay Bianca de Vera dahil sa personalidad nito.
Sabi pa ni Dustin Yu, "Nakakatawa kasi siya nu'ng una. So sabi ko, parang 'Hindi ako mabo-bore dito, a. Parang masarap siyang kausap palagi, a?'"
Nilinaw naman ni Bianca de Vera na hindi pa niya boyfriend si Dustin Yu. Pagbabahagi ng aktres, sadyang nakakuha lang siya ng comfort sa aktor, dahilan para magbago ang pagtingin niya rito.
Sabi ni Dustin Yu, faithful siya kay Bianca de Vera at sinabing walang balak manligaw ng iba. Sa katunayan, naghihintay na lang siya ng sagot mula sa aktres.
Paliwanag naman ni Bianca de Vera sa hindi pa niya pagbibigay ng matamis na oo kay Dustin Yu, "I think hindi rin naman kami nagmamadali. I mean, we have so much time together. I mean, Dustin is a great guy. I think he is the most consistent man I've ever met in my whole life, well, of course, besides my dad, and grabe rin kasi manindigan si Dustin, which I admire very, very much. We're not running out of time, naman."