Mas lumalalim na ang relasyon nina Herlene Budol at Kevin Dasom simula noong una silang nagkatrabaho sa GMA Afternoon Prime series na 'Binibining Marikit.' Sa katunayan, nililigawan na ng huli hindi lang ang beauty queen-actress, kundi maging ang pamilya nito.
Sa pagbisita nila sa Fast Talk with Boy Abunda nitong Lunes, December 22, kinamusta ni King of Talk Boy Abunda ang relasyon ng dalawa. Dito, binigyang-linaw nila ang kumakalat na balitang kinagagalitan ng aktres ang Thai-Irish model.
Paliwanag ni Herlene, “Kasi sabi ko, picture kami together. Sabi ko, 'Dito!' Ang OA lang naman kasi 'yung mga tao, akala nila, palagi kong inaaway. Kung sino ka man, ganun lang po talaga ako mag-ano... Kumbaga, malaki lang talaga 'yung reaksyon ko palagi.”
Nilinaw din ni Kevin na hindi naman siya inaway ng aktres. Sa halip, minamadali lang siya nito dahil may maiksing oras lang para makunan sila ng litrato.
Napag-usapan din nila ang next step sa relasyon nina Herlene at Kevin, at kung papaano nagkita sa Thailand ang kani-kanilang mga pamilya.
Alamin ang kuwento ng relasyon nina Herlene at Kevin sa gallery na ito:
Pag-amin nina Herlene at Kevin, maganda ang relasyon nila ngayon bilang magkaibigan. Sa katunayan, naging mas malapit pa sila sa isa't isa simula nang magkatrabaho sa dating GMA Afternoon Prime series na 'Binibining Marikit.'
Pag-amin ni Herlene, hindi rin niya alam kung bakit maganda ang pagkakaibigan nila ni Kevin. Aniya, madalas silang nagkakasundo ni Kevin.
Ayon naman kay Kevin, nililigawan pa rin niya ang beauty-queen-actress. "We're very happy together, like everyone says, we get along very well but it's a work in progress," sabi ni Kevin.
Dahil sa nakikitang magandang samahan ng dalawa, tanong ni Boy, "Ito bang inyong pagkakaibigan, papunta na saan?" Ayon kay Herlene, depende kung gaano katiyaga si Kevin sa kaniya.
Pagbabahagi pa ni Herlene, "Kasi sabihin naman natin, minsan, hindi naman natin masasabi kung totoo bang lahat ng nasa TV, 'di ba? Umabot naman ng isang taon 'yung friendship namin, tingnan natin, Tito Boy. Time will tell."
Para naman kay Kevin, "I think, as you walk the journey, you don't know where it ends, you enjoy it, you enjoy while you're doing it."
Pag-amin naman ni Kevin, bukod kay Herlene ay nililigawan niya rin ang pamilya ng aktres. "For Herlene, it was not something that needed to be done, but it meant a lot to her."
May ilang pagkakataon na ring nagpunta si Herlene kasama si Kevin sa Thailand. Noong unang pagkakataon kasama pa ng una ang kanyang ina.
Sa paraehong pagkakataon, nakilala nina Herlene at ng kaniyang ina ang pamilya ni Kevin, at naging maganda naman umano ang naging reaksyon nila dito.
Sabi naman ni Herlene sa pagkikita ng mga pamilya nila ni Kevin, "Masaya lang, parang nagkaroon kami ng pamilya du'n, kami nila mama."