Sa kabila ng kanilang mga ngiti at komedya, aminado sina Bubble Gang stars Kokoy De Santos at Matt Lozano na dumaan din sila sa depresyon.
Naging paksa sa Fast Talk with Boy Abunda noong Biyernes, October 24, ang mental health.
Dito, ikinuwento nina Kokoy at Matt ang naging karanasan nila sa depresyon at ibinahagi kung paano nila nalagpasan ito.
Alamin ang kwento nina Kokoy at Matt tungkol sa depresyon sa gallery na ito:
Pagbabahagi nina Kokoy at Matt, dati na nilang pinagdaanan ang depression.
Pagbabahagi ni Kokoy, noong hindi pa niya nararanasan ay naniniwala na siya sa depression. Kwento ng aktor, "'Yung mga tropa ko at mismong kapatid ko, na-experience siya, e. So kahit pa ako mismo hindi siya na-experience pa that time, naniniwala ako."
Umabot din umano sa punto si Kokoy na na-depress siya ng walang dahilan, at inamin niyang sobrang hirap ang pinagdaanan niya noon. "Parang nilalamon ka ng kadiliman and all," sabi ng aktor.
Ilang beses na ring naibahagi ni Matt ang karanasan niya sa depresyon. Sa katunayan, umabot pa sa puntong na-bash siya dahil sa isang nakakagulat na headline.
Kwento ni Matt, nagmamaneho siya noon ng 100km per hour at gusto nang ibangga ang minamaneho niyang sasakyan dahil sa sobrang lungkot, bago siya nakahanap ng magsasalba sa kaniya.
Nagkaroon din ng kaniya-kaniyang savior sina Kokoy at Matt. Kung si Kokoy, naging sandigan niya ang mga kaibigan at pamilya, si Matt ay itinaas lahat sa Diyos.
Idiniin ni Kokoy ang importansya ng pamilya at mga kaibigan para makaalis sa depression, "Ang laking bagay, Tito Boy, na nandiyan 'yung tropa, pamilya, kaibigan, na napagsasabihan palagi."
Samantala si Matt, inangat naman sa Diyos ang lahat para makaalis sa depression. Aniya, habang nangmamaneho noon ay may nadaanan siyang simbahan, at doon siya tumigil at nagdasal.
Samantala, aminado naman si Kokoy na malaki rin ang epekto ng social media sa mental health ngayon ng mga kabataan, lalo na at dahil dito ay tila lahat ay may opinyon sa personal na buhay ng isang tao. Kaya naman, pagbabahagi ng aktor, pinapakinggan lang niya ang boses na importante sa kaniya.
Sang-ayon naman dito si Tito Boy, at sinabing pinipili lang din niya ang mga boses na importante sa kaniya. "I will not give anyone the power to control my feelings. 'Yung parang halimbawa, babasa lang ako, 'Ang pangit mo, hindi ka marunong mag-host, ang yabang mo, etc.' I'm not gonna allow these words to define who I am," saad ng batikang host.