Kilala si Matthew Mendoza bilang isa sa pinakagwapong male lead noong '90s. Kaya hindi na nakapagtataka na nagkaroon ng maraming leading ladies ang aktor at commercial model.
Sa 'Fast Talk with Boy Abunda' nitong Huwebes, July 9, binalikan ni Matthew ang mga proyektong ginawa niya noon, kabilang na ang leading ladies na nakatambal niya.
Tingnan ang pagbabalik-tanaw ni Matthew sa gallery na ito:
Kilala si Matthew bilang isa sa mga gwapong male lead noong '90s. Kaya naman, hindi na nakapagtataka na marami rin siyang naging memorable na leading ladies
Isa sa mga hindi niya malilimutang leading lady ay ang aktres at dating beauty queen na si Charlene Gonzalez. Nagkasama ang dalawang aktor sa tatlong pelikula: ang 'Dyesebel' (1996), 'Ikaw Naman ang Iiyak' (1996), at 'Bridesmaids' (1997).
Pinaka nasiyahan daw si Matthew sa 'Dyesebel' dahil "in his element" ang aktor dito. "I really love the ocean, mahilig ako sa mga boats and dagat, doon ako lumaki, e. So, when we did 'Dyesebel,' parang sabi ko, 'At home ako dito,'" sabi ng aktor.
Tumatak naman kay Matthew ang pelikula nila ng aktres na si Dawn Zulueta, ang 'Ikaw Naman ang Iiyak,' dahil sa set location nito Cebu. Ani ng aktor, malaking bahagi ng kanilang pelikula ay kinunan doon.
Kwento ni Matthew tungkol kay Dawn, "She was always on time, medyo ano talaga siya, strict. 'Pag sinabing take, take, walang take 2, walang take 3. And 'pag sinabing 'Action!' alam na niya kaagad 'yung gagawin niya--very professional at napakahusay."
Naging memorable din kay Matthew Mendoza ang pakikipagtrabaho kay Megastar Sharon Cuneta.
"Pero to work with Sharon Cuneta, Tita Shawie, '80s Shawie, '90s Shawie, and then isang araw, katrabaho mo siya, parang 'yung feeling na hindi mo alam ang gagawin mo, 'Baka pumalpak ako,' and everything. It was something na hindi mo makakalimutan," pagbabahagi ni Matthew.
Ang dating aktres na si Mikee Conuangco ang pinakamadalas namang makasama ni Matthew Mendoza sa TV shows. Sa katunayan, nakakuha pa nga siya ng Most Guested Actor award mula sa aktres na hanggang ngayon ay nasa kaniya pa.
Sa dami ng kaniyang mga naging leading ladies, inamin ni Matthew na wala siyang niligawan kahit isa. Sa katunayan, wala siyang naging girlfriend na galing sa show business.
Sa halip, marami umanong naging ka-close si Matthew Mendoza sa industriya, katulad nina Ina Raymundo, Ara Mina, at G Tongi.