Maituturing bilang isa sa mga pinakamabilis ang naging takbo ng relasyon ng GMA News reporter na si Mav Gonzales at aktor na si Matthew Valeña. Ilang buwan lang kasi matapos silang magkakilala ay na-engage at nakasal na sila.
Sa Fast Talk with Boy Abunda nitong Biyernes, December 19, tinanong ni King of Talk Boy Abunda ang naging simula ng kanilang relationship. Binalikan ng batikang host ang pinsot noon ni Mav.
“In 2019, you posted, 'Mas mabuti nang wala kesa sa mali.' Where was that coming from?” ani Boy.
Sagot naman ni Mav, pinost niya iyon dahil marami na ang nagsasabi na nawawalan na siya umano ng oras dahil 29 na siya ngunit wala pang asawa.
“Sabi ko, kesa mamili ako ng kahit sino lang, kasi I do date, pero kung hindi talaga nagwo-work o hindi talaga siya okay for me, e, di 'wag na lang,” sabi ni Mav.
Pero hindi ibig sabihin nito ay hindi na naghanap si Mav ng mamahalin. Alamin ang kwentong pag-ibig nila ni Matthew sa gallery na ito:
Aminado si Mav na pinagdasal niya ang kaniyang asawa. "Sinasabi ko, gusto ko attractive to me. Kasi, di ba, bakit naman gugustuhin ng asawa nang hindi ko gusto 'yung hitsura? Siyempre, 'pag nagpe-pray ako, 'Lord, bigay mo po 'yung mabait, 'yung attractive to me, 'yung matalino, funny.'" Ngunit si Matthew, simple lang ang panalangin sa mamahalin, ang makahanap ng tao "that fit with where I was in life."
Pagbabahagi pa ni Mav, naging panalangin din ng lolo ni Matthew para sa aktor na makahanap siya ng Filipina na mamahalin.
Kuwento ni Mav, nagkakilala sila ni Matthew sa isang dating app. Dahil pareho silang interesado sa isa't isa, nagkaroon ng pagkakataon na magkausap sila sa app.
Paglilinaw ng GMA News reporter, hindi naman siya agad-agad nakipagrelasyon kay Matthew. "Kasi reporter, so kailangan may due diligence ako. Kailangan sure ako na totoong tao 'to, na siya talaga 'yun, so that's actually what I did with him. After we matched, I asked for his social media kasi gusto ko lang tingnan kung totoong tao ba siya."
May anim na buwan lang simula nu'ng magkakilala sila nang makasal sina Mav at Matthew. Kwento ng aktor, una pa lang ay nag-usap na sila kung anu-ano ang mga plano nila sa buhay. At nang mag-line up ang ilan sa mga iyon, nagdesisyon na siyang mag-propose.
Paliwanag ni Matthew, sa halip na maghanap ng taong mache-check ang boxes ng ideal person, mas mabuting maghanap ng tao na wala kang mahahanap na mali. "Try to find somebody who actually has nothing wrong with them. Like, 'You know what? I cannot find something wrong.' And I couldn't find something wrong with her," sabi ni Matthew.
Ang pagiging intentional din ni Matthew ang dahilan kung bakit naisip ni Mav na nakita na niya ang the right one sa asawa. Inilahad umano ni Matthew ang mga ayaw at gusto niya sa buhay at ganu'n din siya.
Dahil pareho ang gusto nilang mangyari sa buhay at handa nang mag-settle down, napapayag na rin si Mav na magpakasal kay Matthew.
Pag-amin ni Mav, wala problema sa pagitan nila ni Matthew, pero mas marami pang pangamba ang mga tao sa paligid nila. Ang isa, kwento ng GMA News reporter, handang ipa-background check ang aktor sa FBI.
Ilang buwan matapos ang kasal nila, may bagong milestone sina Mav at Matthew sa kanilang relationship. Ani Mav, "We're expecting our first baby." Hindi man nila ito inaasahan, masaya naman ang dalawa sa pgsisimula ng kanilang pamilya at naghahanda na sila para rito.