Sa show business, hindi na bago ang kompetensya sa pagitan ng mga artists, lalo na at iisang industriya lang naman ang ginagalawan nila. Ngunit ayon kina Mitch Valdez at Fe De Los Reyes, wala namang naging kompetensya sa pagitan nilang mga artist noong '80s.
Sa pagbisita nila sa Fast Talk with Boy Abunda, binalikan nina Mitch at Fe ang kanilang karera noong '80s kung saan parte sila ng kani-kanilang grupo.
Alamin kung ano ang naging karanasan nina Mitch at Fe noong '80s sa gallery na ito:
Ayon kina Mitch at Fe, hindi kailanman nagkaroon ng competition sa pagitan nila at ng kanilang mga kasamahan sa acts o grupo.
Pagbabahagi ni Mitch, noong '70s ay meron siyang "double life" bilang isang musical theater performer at rocker. Ngunit noong '80s, binago niya ang sarili at naging lounge act kasama nina Tessie at Nanette.
Nakasama ni Mitch sina Tessie Tomas at Nanette Inventor sa lounge acts at ayon sa kaniya, wala naman silang naging kompetisyon ng una dahil matalik silang magkaibigan.
Pagbabahagi pa ni Mitch, nakasama naman niya si Nanette sa programang "Tit for Tat" kaya hindi sila pwedeng magkaroon ng kompetensya. Sa halip, nagtutulungan sila.
Ayon kay Fe, ang nangyayari noon ay nako-complement nilang mga artists ang isa't isa.
Parte naman noon si Fe ng bandang Music and magic kung saan mga kabanda niya sina Bobby Taylo, Butch Elizalde, Nonoy Mendoza, Angeli Pangilinan-Valenciano, Kuh Ledesma, Eva Caparas, Jet Montelibano at Toto Gentica.
Wala rin umanong kompetensya sa pagitan ng mga miyembro ng banda at sa halip, itinuturing nila ang isa't isa bilang pamilya.
Ngunit pag-amin ni Fe, nag-aaway-away din naman sila. Aniya, madalas niyang nakaka-away si Angeli. Ngunit kahit ganoon, sinabi pa rin niyang lagi silang magiging isang pamilya.
Ayon kay Fe, noon pa man ay alam na nilang magso-solo si Kuh at hihiwalay na sa banda. Kaya naman, hindi na sila nabigla noong nilisan nito ang kanilang grupo.
Sa ngayon ay naghahanda na sina Mitch at Fe para sa kanilang upcoming show na "Sex and the Seniors" na gaganapin ngayong July 26 sa Teatrino at Promenade sa Greenhills, San Juan kung saan ipinangako nilang mapupuno ng saya at musika ang gabi.