Isa na namang masayang araw sa loob ng Bahay ni Kuya, lalo na't dalawang bagong PBB houseguests ang pumasok at nakisaya!
Doble ang energy ng celebrity housemates nang makilala na nila ang BINI members na sina Jhoanna at Stacey.
Sa unang interaksyon pa lang, labis itong pinusuan ng netizens. Marami ang natuwa lalo na nang hindi mapigilan ni Esnyr ang kanyang excitement na makasama ang kanyang mga paboritong P-pop singers.
Hindi rin napigilan ng ibang PBB housemates ang kilig at excitement na makapag-picture kasama ang dalawang BINI members.
Maliban sa kanilang unang pagkikita, pinusuan din ng fans ang pag-open up nina Jhoanna at Stacey. Marami ang mas humanga sa BINI sa kanilang mga kuwento bilang performers at bilang lider.
"Ako kasi leadership isn't about strictness, it's about guiding your members with heart. Hindi mo kailangan magalit, 'di mo kailangan sumigaw. Ako kasi mas gusto ko and mas sinusunod ko 'yung mga taong minsan lang magalit. Kasi once magalit sila, ibig sabihin may reason," paliwanag ni Jhoanna bilang leader ng BINI.
Agad pinag-usapan online ang kanilang nakakatuwang interaksyon, na nag-trend pa sa iba't ibang social media pages. Ang hashtags o topics tulad ng #PBBCollabBloom, #BINIxPBBCollab, #bini_jhoanna, at at thurslay with jhocey ay umabot sa top trending list ng X (dating Twitter).
Mapapanood ang Pinoy Big Brother Celebrity Collab Edition tuwing weekdays 10:00 p.m. at weekends, 6:15 p.m., sa GMA, Kapuso Stream, GMANetwork.com, GMA Pinoy TV, Kapamilya Online Live, iWanTFC, at TFC.
Maaari ring silipin ang mga kaganapan ngayon sa loob ng Big Brother house sa All-Access Livestream ng programa.
Samantala, kilalanin ang iba pang celebrity houseguests sa Pinoy Big Brother Celebrity Collab Edition dito:
Ang sikat na vlogger-actress na si Ivana Alawi ang pinakaunang houseguest sa Bahay ni Kuya sa Pinoy Big Brother Celebrity Collab Edition.
Isa sa naging tasks ni Ivana Alawi sa loob ng iconic house ay ang pagpapanggap na isa rin siyang housemate. Nakilala siya sa Pinoy Big Brother bilang Phenomenal Content Queen ng Quezon City.
Bukod kay Ivana Alawi, isa rin sa mga unang pinapasok sa Bahay ni Kuya ang Kapuso Royal Tropa ni Kuya na si Mavy Legaspi.
Limang araw nanirahan si Mavy Legaspi sa loob ng Bahay ni Kuya kasama ang celebrity housemates.
Isa sa mga pangarap ng Kapuso star na si Gabbi Garcia mula noong siya ay bata pa ay ang makasali sa Pinoy Big Brother at makapasok sa Bahay ni Kuya. Kasalukuyan siyang napapanood bilang isa sa hosts ng bagong season ng teleserye ng totoong buhay.
Sa isang episode ng Pinoy Big Brother Celebrity Collab Edition, labis na nasorpresa ang Kapuso It Girl ni Kuya na si Gabbi Garcia nang bigla siyang papasukin ni Kuya sa iconic house.
Natunghayan sa isang episode ng programa ang pagbisita nina Kim Chiu at Paulo Avelino sa Bahay ni Kuya para makisaya sa grand opening ng paresan ng celebrity housemates.
Nagdala ng kilig at saya sina Kim Chiu at Paulo Avelino na kilala bilang KimPau sa pagpasok nila sa loob ng Bahay ni Kuya.
Isa rin sa houseguests ni Kuya ay ang Sparkle star at Miss Universe Philippines 2023 na si Michelle Dee.
Pumasok si Michelle Dee sa Bahay ni Kuya matapos ang mga kaganapan sa first eviction night ng Pinoy Big Brother Celebrity Collab Edition.