Sa huling gabi ng blind auditions ng The Voice Generations noong Linggo, September 24, limang team ng mga mahuhusay na talent ang nagpakitang gilas gamit ang kanilang pangmalakasang mga boses.
Kabilang sa mga team na ito ay ang mother-and-daughter duo na sina Jill and Grace, duo rin na sina Kris and Cha, father-and-son duo na sina Mark and Willy, trio na Chancess, at girl group na GCode.
Sa kabila ng kanilang mga husay, apat na teams lamang ang napili ng apat na coaches na sina Billy Crawford, Julie Anne San Jose, Stell Ajero, at Chito Miranda upang magpapatuloy sa kompetisyon.
Kilalanin ang grupo ng mga talent na kumumpleto sa teams ng coaches sa huling blind auditions ng The Voice Generations:
Isang OPM classic song na “Yakapin Mo Ako” ang inawit ng duo na sina Kris at Cha sa kanilang blind auditions.
Idinaan ni Coach Chito Miranda sa kanyang matagal nang experience sa music industry ang panliligaw kina Kris at Cha kung kaya't napabilang sila sa Parokya Ni Chito.
Isang maangas na performance naman ang ipinakita ng batang girl group na GCode nang awitin nila ang kantang “Amakabogera.”
Hindi naman nagpakabog si Coach Billy Crawford sa kapwa coach na si Coach Chito Miranda sa panliligaw sa grupong GCode. Kung kaya't sila ang huling grupo na kumumpleto sa team na Team Bilib.
Hindi nasayang ang chance ng trio na Chancess na makapasa sa blind auditions ng The Voice Generations sa kanilang rendition ng awiting "Tadhana."
Napaikot ng Chancess ang upuan ni Coach Julie Anne San Jose dahil sa kanilang galing. Dahil dito, sila na ang huling grupo na kumumpleto sa team Julesquad.
Isang nakakatindig balahibong performance ang ipinamalas ng father-and-son duo na sina Mark Willy sa kanilang sariling rendition ng awiting “Ikaw Ang Pangarap.”
Hindi pinakawalan ni Coach Stell ang mag-amang sina Mark at Willy kung kaya't sila ang huling talents na kumumpleto sa team Stellbound.