Around GMA

Article Inside Page

Extended ang Halloween ngayong taon dahil mapapanood na ang horror anthology film na KMJS' Gabi ng Lagim The Movie simula November 26.

Bibida rito sina Jillian Ward, Sanya Lopez, Elijah Canlas, at Miguel Tanfelix, at sa pagsasalaysay ng award-winning broadcast-journalist na si Miss Jessica Soho.

Makakasama rin nila sa pelikula sina Rocco Nacino, Therese Malvar, Ashley Ortega, Epy Quizon, Kristoffer Martin, Jon Lucas, at iba pang premyadong aktor.

Sa naganap na media con sa Hungry Neighbors sa Tomas Morato nitong Martes, November 19, ipinangako ni Jessica na magiging mas nakakatakot, mas kagimbal-gimbal, at mas dapat panoorin ang movie version ng Halloween special ng Kapuso Mo, Jessica Soho.

“Next level. Gusto rin namin mag-next level 'yung ginagawa namin every year. 'Di ba, siyempre 'pag nanood ka sa TV, it's just a watching experience. Pero 'pag pumasok ka na sa isang madilim at malamig na sinehan, it becomes a total experience,” sabi ni Miss Jessica.

“Iba 'yung nakikisigaw ka du'n, natatakot ka du'n, tapos siyempre mas binusisi 'yung mga detalye ng pelikula, nandiyan sina Direk Dodo Dayao. Siyempre 'yung mga detalye, 'yung mga prosthetics, inayos nila nang mabuti, at saka 'yung acting ng pinakamagagaling nating artista ng Sparkle. 'Yun ang iba,” pagpapatuloy ng award-winning host.

KILALANIN ANG MGA BIDA NG 'KMJS' GABI NG LAGIM THE MOVIE' SA GALLERY NA ITO:

Present din sa naturang media con sina GMA Pictures President Atty. Annette Gozon-Valdes, at GMA Pictures Executive Vice President Nessa Valdellon. Sa speech ni Atty. Annette, inamin niyang napakaraming firsts sa naturang pelikula.

“Ito ang first trilogy na horror ng GMA Pictures, ito rin ay pinagbibidahan ng mga best of the best na Sparkle artists ng GMA, and what makes this film really momentous is that Miss Jessica Soho has lent Kapuso Mo, Jessica Soho to this movie,” sabi niya.

“It's such an honor and privilege to have a movie carried by Kapuso Mo, Jessica Soho' 'Gabi ng Lagim,'” pagpapatuloy ni Atty. Annette.

Sabay-sabay na matakot at manginig sa tatlong istoryang hango sa totoong buhay sa KMJS' Gabi ng Lagim The Movie, November 26 in cinemas nationwide.