Around GMA

Article Inside Page

Tila naging nanay na talaga si Manilyn Reynes sa kaniyang Pepito Manaloto: Tuloy ang Kwento co-star na si Jake Vargas. Madalas kasi, kapag may problema raw ang young actor, lumalapit siya sa beteranang aktres at humihingi ng payo rito.

Sa Fast Talk with Boy Abunda nitong Martes, June 2, ipinahayag ni Jake kung gaano kabait sa kaniya si Manilyn, at kung papaano nito itinuturing siyang parang tunay na anak. May mga pagkakataon pa nga, ayon sa aktor na nag-o-open up siya sa aktres at humihingi ng payo.

“Siguro po like hindi ka basta-basta umo-oo. Kasi ako po 'yung taong laging oo nang oo kahit hindi ko naman gusto 'yung ginagawa. Hindi po ako marunong humindi,” sabi ni Jake.

At ang payo naman ni Manilyn sa kaniya, “Sabi ko sa kaniya, Tito Boy, you can say no na hindi ka feeling guilty. Kasi kung ayaw mong gawin, then don't.”

TINGNAN ANG BEST BONDING MOMENTS NG PEPITO MANALOTO CAST SA GALLERY NA ITO:

Alam naman umano ni Manilyn na hindi madaling humindi sa ibang tao, lalo na kung ikaw ay people-pleaser. Pero paalala ng aktres, mas importanteng isipin kung ano ang mas magpapasaya sa 'yo.

“Siyempre kailangan mo rin sumaya. Before ka naman maka-extend ng happiness and ng love sa ibang tao, you have to love yourself first,” sabi ng aktres.

Sang-ayon naman dito si King of Talk Boy Abunda, “It takes a journey, though. Pero may mga nagsasabi nga, 'Saying no is power.'”

Samantala, inamin din ni Jake na masarap nga sa pakiramdam na may nalalapitan siya para mahingahan kapag may problema. Ayon sa aktor, kahit papaano ay nawawala ang mga iniisip niya, lalo na at overthinker siya.

Panoorin ang panayam kina Manilyn at Jake dito: