Around GMA

Article Inside Page

Kabi-kabila ang projects ng premier leading lady na si Bea Alonzo mapa-TV man o endorsements.

Kasalukuyan siyang napapanood bilang judge sa GMA weekly reality show na Battle of the Judges at may upcoming series pa, ang Love Before Sunrise na pagbibidahan nila ni Dennis Trillo.

"We're actually kind of halfway there so medyo madami pa kaming isu-shoot," bahagi ni Bea sa panayam ng entertainment reporters sa ginanap na product launch event ng Oppo Reno10 5G series sa Pandanggo Ballroom ng Manila Hotel noong August 3.

Ayon kay Bea, magsu-shoot din sila sa ibang bansa para sa inaabang GMA-Viu series.

Patuloy ng aktres, "And I believe we're going to Canada very, very soon to shoot so medyo inaasikaso lang 'yung visa. Sana walang maging problema para makaalis na."

Dagdag pa ni Bea, excited siyang kunan ang mga eksena nila sa Canada.

"Napakaganda ng mga eksenang isinulat na magaganap sa Canada so hopefully wala talagang maging aberya.

"I'm very, very excited kasi every opportunity where I can go out of the country, I will take it and, plus, we might perform there for our Kapuso in Canada so baka mag-peform kami for the GMA Pinoy TV fans."

Kabilang din sa cast ng Love Before Sunrise ang mga bigating artista na sina Andrea Torres, Sid Lucero, Matet de Leon, Vaness del Moral, Isay Seña, Tetchie Agbayani, Ricky Davao, at Nadia Montenegro, at Sparkle artists na sina Vince Maristela at Cheska Fausto.

Ang Love Before Sunrise ay mula sa direksyon ni Mark dela Cruz.