MUST-READ: Ang mga bigating teleseryeng dapat abangan sa 2018

Maghanda na sa pagpasok ng taong 2018 dahil handog ng Kapuso network ang ilan sa mga bigating teleserye na pagbibidahan ng inyong mga paboritong Kapuso stars.
 
Nariyan ang The Stepdaughters na pagbibidahan nina Miss World 2013 Megan Young, Katrina Halili at Mikael Daez. Mula't simula sadyang itinadhana na hindi magkasundo sina Mayumi (Megan) at Isabelle (Katrina). Bagama't kapwa ipinanganak sa hirap, isang lihim na pag-aangkin ng yaman ng pamilya ni Isabelle kina Mayumi ang dahilan upang lumaki silang magkasalungat ang buhay. Higit pang titindi ang alitan nang pakasalan pa ng ama ni Isabelle ang ina ni Mayumi at naging stepsisters sila. Magkaagaw sa atensyon ng pamilya, magkalaban sa karangalan at kayamanan at higit sa lahat, magkaribal sa iisang lalaking bumihag sa kanilang mga puso. Sino sa dalawa ang magwawagi sa laro ng buhay at pag-ibig? Abangan 'yan sa The Stepdaughters.
 
Balik-tambalan naman sina Ruru Madrid at Gabbi Garcia sa bagong Kapuso series na pagbibidahan din ng isang talentadong aso na nagngangalang Selena. Makakasama ng GabRu and Kapuso leading lady na si Janine Gutierrez na gaganap sa isang special guest role. Kamakailan nga ay nag-dog training si Janine para lang sa telerseyeng ito.
 
Nitong taon din mangyayari ang biggest television project ni Pambansang Bae Alden Richards. Kaabang-abang ang kakaibang kuwento ng teleseryeng ito na siguradong magugustuhan ng buong pamilya.
 
Mangyayari na rin ang pinakahihintay ng fans ng Descendants of the Sun dahil magkakaroon na ito ng Philippine version na mapapanood sa GMA.
 
Muli namang magtatambal sina Barbie Forteza at Derrick Monasterio para sa isang romantic comedy na pinamagatang Bongga Ka 'Day.
 
Huwag palampasin ang mga teleseryeng ito at marami pang iba sa 2018!