Around GMA

Article Inside Page

Napanood niyo na ba ang pinakabagong commercial kung saan muling bumida ang isa sa Sparkle talents na si Celine Fajardo?

Muling ipinamalas ni Celine ang kanyang husay sa pag-arte sa pinakabagong Valentine commercial series na mapapanood ngayon sa social media.

Sa mahigit apat na minutong video, mapapanood si Celine bilang si Mina, ang girlfriend ni Carlos Galano na gumanap naman bilang si Brian.

Ang bagong Jollibee commercial na ito ay pinamagatang “600 Days,” ang karugtong na kuwento ng naunang episode na pinamagatang “LDR” na ipinalabas sa social media noong February 2021.

Matatandaang sa unang episode nito ay ginampanan din ni Celine ang karakter ng isang girlfriend na nasanay na palagi niyang kasama ang kanyang kasintahan.

Umikot ang kuwento ng naturang commercial sa buhay ng magkasintahang sina Mina at Brian na sinubok ng matinding sitwasyon habang sila ay malayo sa isa't isa.

Bigla na lamang nasubok ang relasyon nila nang ipinatupad na ang lockdown at quarantine protocols dahil sa mabilis na pagkalat ng isang virus.

Sa kalagitnaan naman ng video, mapapanood kung paano nila napagtagumpayan ang mga pagsubok na kanilang pinagdaanan.

Mula nang ipinalabas ito sa social media, lubos na minahal ng mga Pinoy ang kuwentong pag-ibig nina Mina at Brian na hango sa isang real-life story.

Sa kasalukuyan, ang Valentine commercial series na “LDR” ay mayroon nang mahigit 10.5 million views sa YouTube.

Ang bagong episode naman nito ay mayroon nang mahigit 900,000 views mula nang i-upload ito sa YouTube kahapon, February 9.

Ilang netizens naman ang muling kinilig sa natatanging pagganap ng Sparkle beauty na si Celine at ng aktor na si Carlos sa kanilang mga karakter sa naturang series.

Ang hit Valentine commercial series na ito ay idinirek ng mahusay na direktor na si Antoinette Jadaone.

Samantala, kilalanin ang Sparkle's next brightest stars ngayong 2022 sa gallery na ito: