Around GMA

Article Inside Page

Kilala ang GMA Public Affairs host na si Susan Enriquez sa paghahatid ng iba't ibang mga kuwentong nagbibigay inspirasyon sa bawat mamamayang Pilipino.

Ang tinaguriang “Kumare ng Bayan” ang nagsisilbing host ng GMA program na Pera Paraan, kung saan ibinabahagi ang practical tips pagdating sa pera at negosyo, at IJuander, kung saan malalim na pinag-uusapan ang iba't ibang aspeto ng kulturang Pilipino.

Sa isang panayam sa batikang broadcast journalist, nagbigay siya ng ilang mahahalagang payo para sa mga nais maging mamamahayag.

Ayon kay Susan, importante na ikuwento ng isang journalist ang katotohanan, lalo na sa panahon na laganap ang fake news o misinformation.

Aniya, “Kung itutuloy nila 'yung pagtahak dito sa larangan ng pamamahayag bilang journalists, ilahad nila 'yung totoong kuwento. At sana lagi sa paglalahad nila ng mga kuwento, makakatulong 'yon para magbigay ng inspirasyon doon sa mga taong makakapanood ng kuwentong ilalahad nila mula sa kuwento ng ibang taong nakausap nila.”

Kuwento pa ni Susan na malaki ang kahalagahan na maibahagi ang mga istorya ng ordinaryong Pilipino dahil ito ang nagbibigay ng koneksyon at inspirasyon sa mga manonood.

“Halimbawa, 'yung kuwentong inilalahad mo, napanood ng viewers at parang gano'n din 'yung kuwento ng buhay nila. Kung 'yung istoryang inilalahad mo will inspire doon sa mga manonood, e 'di kahit papaano nakatulong ka.

“Napakahalaga talaga na naikukuwento natin nang maayos [at] maliwanag 'yung mga kuwento ng ibang tao para magkaroon ng koneksyon doon sa ating mga manonood,” saad niya.

SAMANTALA, ALAMIN ANG IBA'T IBANG AWARD-WINNING GMA PUBLIC AFFAIRS SHOWS SA GALLERY NA ITO.