Around GMA

Article Inside Page

Hindi naiwasan ni Aiai Delas Alas ang mga tanong ng entertainment reporters tungkol sa programang kinabibilangan niya ngayon, ang Sunday PinaSaya.

Aiai Delas Alas

Naging usap-usapan kasi kamakailan ang blind item ni Jojo Gabinete sa PEP.ph na “Dalawang weekly shows ng major TV network, titigbakin na.”

Ayon dito, “Hindi na ire-renew ng network management ang kontrata ng blocktime deal nila sa independent television producer, kahit mataas ang ratings ng programa na mahigit apat na taon nang napapanood.”

Ilan sa mga programang nabanggit sa social media comments ang Sunday variety show ng GMA Network, ang Sunday PinaSaya.

Agad naman itong sinagot ni Aiai, “Ay, sabi ng isa sa mga executive namin, ang isagot ko ay, 'Tuloy ang saya.'”

Dagdag pa niya, “Hindi natin alam kung ano ang ibig sabihin niya, basta ituloy lang natin ang saya!”

Kung sakali raw, ikalulungkot ito ni Comedy Queen Aiai.

“Malulungkot ako kasi maglilimang taon na rin kami next year.

“Malulungkot ako, siyempre, life must go on. Lahat naman ng show na nagsasara, mag-o-open ng doors,” aniya.

Ngunit muli niyang idiniin na wala pang anumang balita na nakakarating sa kanya at sa mga kasamahan niya sa Sunday PinaSaya.

Naniniwala rin siya na nananatiling malakas ang kanilang programa.

Hirit pa niya, “Yung commercial nga naming isang oras, e. Isa't kalahati kami, di ba? Yung isang oras dun, commercial yun.”

Nang pilit pang kinulit ng reporters tungkol sa isyu, tumanggi nang magsalita si Aiai.

Aniya, “Ayaw ko namang magsalita baka sabihin atribida ako, nega ako. Huwag naman ganun.

“Siyempre, doon lang tayo sa positive vibes kasi puro positive ang nangyayari sa akin ngayon.”

Muling pumirma ng three-year network contract si Comedy Queen Aiai sa GMA Network kaninang umaga, October 29.

Aiai Delas Alas renews contract with GMA