Around GMA

Article Inside Page

Sa pagbisita nina Ken Chan at Rita Daniela sa Sarap, 'Di Ba? ay ikinuwento nila kung paano naganap ang aminan ng feelings sa isa't isa, ang kanilang hindi pagkakaunawaan, at pagbabalik ng maganda nilang samahan bilang magkaibigan.

Ayon kay Rita, pinaghandaan niya ang pagsabi ng nararamdaman niya para kay Ken.

"Gumastos ako, Ms. Mina (Carmina Villaroel). Nagpa-reserve lang naman ako ng isang cottage tapos kami lang naka-reserve that day so sa amin 'yung buong bundok. Para kaming nasa pelikula tapos may naka-set up na picnic."

Dugtong ni Ken ang sumunod na nangyari sa pag-amin ni Rita.

"Through letters, tapos 'yung sulat sobrang liliit, tapos binasa niya sa harap ko while she's crying."

Inamin ng dalawa na mahal nila ang isa't isa pero pinili raw ni Ken na hindi mapunta sa relasyon ang kanilang samahan.

"Ang sabi ko, thank you. But I'm sorry."

Dugtong pa ni Ken, ginawa niya ito para hindi masaktan si Rita. "I was not ready. I was starting my businesses. Sabi ko sa kaniya, hindi pa ako handa. Kasi kung magsisinungaling, sige let's do this, and I am not ready, mas lalo ko siyang masasaktan.

RELATED GALLERY: Ken Chan and Rita Daniela's sweet reunion at the 'Queendom: Live' concert

Itinanong naman ni Carmina kay Rita, "Hearing those words, mas gusto mo ba 'yung honesty niya or sana binigyan mo ako ng chance?"

Diretsong sagot ni Rita, "May part na ganoon, may part na kahit triny lang ng kaunti, hanggang saan aabot. At least nagawa kaysa marami kang what ifs."

Sunod na itinanong ni Carmina ay kung paano nanatili ang friendship nina Ken at Rita.

Pag-amin ng dalawa, may isang taon silang hindi nag-usap bago mabalik ang kanilang friendship.

Saad ni Rita, "It really took us time bago kami maging ganito ulit na nakakapag-usap kami, na puwede kami magtabi."