Around GMA

Article Inside Page

Lumaki si Amira sa paniniwalang kung ano ang tinanim, 'yun din ang aanihin. Pero wala naman silang ginagawang masama ni Alex, wala naman silang inaagrabyado, pero katakot-takot na pahirap ang inabot nila sa Maynila.

Tuloy ang pagle-level up ng pambu-bully kay Amira ng Crazy 5. Pati si Alex, magiging target ng power trip ni Seb. Kung ang kapatid ni Amira na si Rose, mukhang natuto nang makisabay sa mga taga-Maynila, sina Amira at Alex, parang lalamunin ng buhay ng lungsod.

Hindi panghihinaan ng loob si Amira dahil alam niyang kailangang ituloy ang laban ng buhay para sa tatay na may sakit, at para mapag-aralan ang misteryosong halamang Mutya.

May pusong-manggagamot talaga si Amira, kaya gusto niyang makatulong sa maraming tao gamit ang halamang tila ibinigay sa kanya ni Maria Makiling.

Sisingilin na ang mga Terra para sa masasamang ginagawa nila. Lalantad ang isang lalaking isinisisi ang pagkamatay ng anak sa produktong binibenta ng mga Terra.

Iho-hostage niya si Portia dahil buhay din ang gusto niyang maging kabayaran sa nangyari sa mahal niya sa buhay. Siya ang magsisimula ng paghihiganting tatapusin ng bagong Amira.