Around GMA

Article Inside Page

Wagi bilang best supporting actor si Soliman Cruz sa 18th Cinemalaya Independent Film Festival para sa kanyang pagganap bilang isang pulis sa suspense indie film na Blue Room.

Pormal na tinanggap ng co-star niyang si Bombi Plata ang parangal matapos hindi makadalo si Soliman sa awards night noong Linggo (August 14) sa CCP Complex sa Pasay City, dahil kasalukuyan siyang nasa lock-in shooting.

Ani Bombi, "Nakapanginginig pala ng kalamnan ang tumakbo paakyat ng entablado upang tumanggap ng parangal para sa isang kaibigang hinahangaan at iginagalang. Kinakabahan akong huwag mabitawan ang tropeo mo at huwag mabulol sa pasasalamat para sa iyo! Mabuhay at Pagpupugay SOLIMAN!!!"

Kabilang sa full-length feature category ng Cinemalaya ngayong taon ang Blue Room na mula direksyon ni Ma-an L. Asuncion-Dagñalan. Mula ito sa panulat ni Siege Ledesma katuwang ang direktor na executive producer din ng pelikula. Executive producer din ng Blue Room ang dating aktres na si Harlene Bautista.

Bukod sa best supporting actor award, nakuha rin ng Blue Room ang best director, Special Jury award, best cinematography (Neil Daza), at best production design (Marxie Maolen Fadul).

Maliban sa Blue Room, tampok din si Soliman sa dalawa pang full-length movies sa 18th Cinemalaya: Angkas ni Rainerio Yamson at Bula Sa Langit ni Sheenly Gener.

Samantala, lilipad patungong Italy si Soliman para sa Orizzonti competition ng 79th

Venice Film Festival kung saan kalahok ang kinabibilangan niyang pelikulang To The North na first feature film ng Romanian director na si Mihai Mincan.

Naging parte si Soliman ng katatapos lang na GMA primetime drama mystery series na Love You Stranger.

Mapapanood muli siya sa primetime via GMA and Quantum Films rom-com series na What We Could Be na ipapalabas simula August 29.

TINGNAN ANG MGA LARAWAN SA SET NG WHAT WE COULD BE: