Around GMA

Article Inside Page

Matapos ang halos dalawang dekada, muling mapapanood ang tanyag na tambalan nina Vilma Santos at Christopher de Leon sa pamamagitan ng When I Met You in Tokyo na isa sa official entries ng 2023 Metro Manila Film Festival.

Espesyal ang mulang pagtatambal ng '70s love team dahil bukod sa pagiging artista, nagkaroon ng pagkakataon si Christopher, na kilala rin bilang Boyet sa showbiz, na idirek ang Star for All Seasons.

Ayon sa batikang aktor, si Vilma, ang direktor ng pelikula na si Rado Peru, at executive producer na si Redgie Magno ang kumumbinse sa kanya para maging associate director.

Natatawang kuwento ni Boyet, “Papaano kakausapin the Star for All Seasons, a big, big star? Paano mo ii-instruct si Vilma Santos on what to do and what not to do? Kaya ako pumasok sa picture as an associate director!”

Tila nag-enjoy naman ang aktor sa kanyang naging trabaho sa likod ng kamera, lalo pa't kilalang-kilala na niya ang lead actress ng When I Met You in Tokyo.

Aniya, “It's a relief that we were so relaxed with each other. Then, she's always telling me, 'Yet, ikaw ang mag-associate director.'' So, I was like given the task of taking good care of Madam V. I enjoyed it so much. Yung artistic juices ko, nalalabas ko, you know, when I am with Madam V. Dito lumabas lahat and I'm very proud of this movie. Halos kami ni Direk Rado Peru ang bumuo ng material. It was fun. It was really fun.”

Hindi ito ang unang pagkakataong nagdirek si Boyet.

“Noong araw pa ako nag-didirect. Pero hindi naman ako full-time director. I did two films already and three teleseryes,” sabi niya.

At dahil sa When I Met You in Tokyo, tila muling nabuhay ang interes niya sa trabahong ito.

“I plan to go back and get serious about my director's dreams of telling stories. I like telling stories kasi even in my case now as an actor. Naglalahad kami ng characters. That's entertainment kasi, our field. Art imitating life or life imitating art.”

Sa kabilang banda, natuwa naman ang award-winning actress sa naging resulta ng trabaho nila ni Boyet.

Paliwanag niya, “Dumating kaming dalawa rito na kami ang nagke-create ng eksena. Kasi dati, artista kaming dalawa. Kung ano yung sabihin sa amin, 'Ikaw, yung ganito-ganyan,' okay lang, gagawin namin.

“But this one, we were involved. Parang, 'Paano kaya kung ganito ang gagawin ko? Ito 'yung gusto kong gawin, ito 'yung gusto kong sabihin,' sasaluhin naman ni Yetbo kasi alam niya ang nararamdaman ko. Ganun namin in-attack 'yung mga importanteng eksena dito sa When I Met You in Tokyo.

Bukod kina Vilma at Boyet, mapapanood din dito ang young love team na sina Cassy Legaspi at Darren Espanto, kasama sina Gina Alajar, Lotlot de Leon, Gabby Eigenmann, Kakai Bautista, at ang baguhang aktor na si John Gabriel.

SAMANTALA, TINGNAN ANG KAPUSO STARS NA BIBIDA SA 2023 MMFF: