Faith Da Silva, naka-date ang isang Korean superstar?
Photo Inside Page
Photos
Inamin ng singer-actress at host na si Faith Da Silva na inimbitahan siya ng Korean-American singer na si Eric Nam sa isang intimate dinner.
Sa Fast Talk with Boy Abunda, ikinuwento ni Faith kung paano sila unang nagkita ni Eric at kung paano nahantong sa isang “date” ang pagkikitang ito.
Kuwento ng aktres, minsang naging guest si Eric sa programang TiktoClock kung saan siya ay nagsisilbing isa sa mga host.
Aniya, “Nag-guest po siya sa TiktoClock and ako 'yung nag-i-interview sa kanya sa mga segment na 'yun.
So after the taping parang nakalimutan ko na ganyan then the next day, someone messaged me na they were inviting me to an intimate dinner with Eric Nam.”
Paglalahad pa ni Faith, noong una ay hindi siya makapaniwala sa natanggap na imbitasyon mula kay Eric.
“So, parang ako talaga, 'O, my gosh,' totoo ba 'to talaga?' kasi he's a superstar, international superstar and karamihan sa friends ko sinusuportahan talaga siya. Parang ako 'yung medyo hindi ko na naabutan, recently ko na lang nalaman. Tapos 'yung mga song niya, 'yung vidoes niya, nagulat talaga ako kasi bakit nga naman ako 'yung i-i-invite 'di ba for an intimate dinner?”
RELATED CONTENT: Korean-American star na si Eric Nam, nag-trend ang guesting sa
'TiktoClock'
Dahil dito, pinaghandaan umano ni Faith ang nasabing intimate dinner kasma si Eric, maging ang mga sasabihin niya rito ay kinabisado niya.
“Ready ako sa questions na itatanong niya kasi magaling siya mag-English, alam ko na makakapag-usap kaming dalawa,” anang aktres.
Pero pagbabahagi ni Faith, hindi lamang pala siya ang inimbitahan para sa nasabing dinner.
“Pero pagdating ko doon marami pala kami. Akala ko talaga na parang kami lang. Wala naman kasi silang sinabi na parang event pala 'to ganyan,” natatawang sinabi ni Faith.
Praktisado na rin niya sana ang sasabihin kay Eric. Aniya, “My work is good. I'm a singer, I host, and I also act. How's Korea?”
Paglilinaw naman ni Faith, masaya pa rin siya sa nasabing dinner, pero pag-amin niya, “Masaya naman kasi I was able to meet new friends pero umasa ako.”
Ayon sa aktres, matagal na rin noong huli siyang nakipag-date kaya excited sana siya sa “date” nila ni Eric.
“Hindi kasi naman matagal na rin po akong hindi nakikipag-date, parang I wanted to experience it again,” ani Faith.
Samantala, kasalukuyang mapapanood ngayon si Faith sa Maging Sino Ka Man bilang si Betty, ang kontrabida sa buhay pag-ibig nina Monique at Carding na ginagampanan ng tambalang BarDa o Barbie Forteza at David Licauco.
Patuloy naman na tumutok sa Fast Talk with Boy Abunda sa GMA Afternoon Prime via television broadcast sa GMA at sa iba pang digital platforms.
