Dennis Trillo, nakatikim ng 'di inaasahang sampal mula kay Sanya Lopez

Isang hindi malilimutang blooper ang nangyari sa isa sa pinaka intense na mga eksena sa GMA wartime family drama Pulang Araw.

Sa hindi inaasahang pagkakataon, nasampal ng aktres na si Sanya Lopez ang co-star na si Dennis Trillo kahit hindi ito bahagi ng eksena.

Hindi rin kasama sa rehearsal ang sampal, pero ipinagpatuloy lang nina Sanya at Dennis.

Ibinahagi ni Sanya ang blooper na ito sa kanyang official Facebook account at bahagyang ipinaliwanag ang aksidente niyang pagkakasampal kay Dennis.

Ayon sa aktres, nagkamali siya ng rinig sa instruction ng acting coach na tumutulong sa kanila sa eksena.

"Sumpain kasi Sanya 🙈 hindi sampalin bhiiii 🤦🏻‍♀️ patawad Yuta 🙊 #PulangAraw," sulat niya sa caption ng kanyang post.

Sa ika-20 linggo ng Pulang Araw, mas tumindi na ang tensiyon sa pagitan ng karakter nina Sanya at Dennis na sina Teresita at Col. Yuta Saitoh.

Gagamiting pain ni Yuta ang kapatid ni Teresita para mapabalik ito. May binabalak naman si Teresita para tuluyan nang makatakas mula sa malupit na asawa.

Patuloy na panoorin ang lalong lumalalim ng kuwento ng Pulang Araw, Lunes hanggang Biyernes, 8:00 p.m. sa GMA Prime.

Maaari rin itong panoorin online sa Kapuso Stream.

Panoorin din ang same-day replay sa GTV, 9:40 p.m.