Kung si Foreign Affairs Secretary Teodoro Locsin Jr. ang masusunod, nais niyang sa armas "itapon" ng pamahalaan ang pera kaysa sa pagtugon sa kahirapan. Kasabay nito, tinawag ng kalihim na "awful job" ang ginagawa ng China sa South China Sea.

Ang pahayag ay ginawa ni Locsin matapos tawagin ni Senador Panfilo Lacson ang kaniyang atensyon kaugnay sa ulat noong 2013 ng China Daily Mail.  Sa naturang ulat, isinaad ni retired rear admiral Zhang Zhaozhong ng People's Liberation Army ang kanilang plano kung papaano sasakupin ang mga lugar na akupado ng Pilipinas sa South China Sea.

“SFA [Secretary of Foreign Affairs] Teddy Boy, a wide reader that you are, I just thought you might have skipped this one which shows the mindset of China on WPS [West Philippine Sea],” saad ni Lacson sa palitan nila ng Twitter ni Locsin nitong Huwebes.

“For whatever it is worth, I hope it will further enrich your perspective from the point of view of foreign policy,” dagdag ni Lacson.

Sagot ni Locsin, “It is a free world now after the CIA defeated the USSR.”

Ang CIA ay Central Intelligence Agency ng Amerika, habang ang dating Union of Soviet Socialist Republics naman ang tinutukoy niyang USSR.

“Every country can speak whatever is on its mind,” dagdag ng kalihim.

Sabi pa ni Locsin, "What it says should not determine foreign policy but it should inform the national budgetary process that we gotta stop throwing money at poverty and throw it at weaponry."

 

 

Bagaman hindi siya eksperto sa foriegn policy, sinabi ni Lacson na tungkulin niyang magbahagi ng impormasyon at tumulong.

Puna ng senador, ang mga sinabi ni Zhang sa naturang ulat ang ginagawa ngayon ng China sa West Philippine Sea, na bahagi ng South China Sea, na halos buong inaangkin ng China.

Nitong Miyerkoles, sinabi ni Locsin na walang makikipagdigmaan nang dahil lang sa mga taklobo.

"I am not going down in history as a clam defender, okay? It's a complaint; we're looking into it; but these are just fucking food," saad ng kalihim sa tweet.

"No one goes to war for clams but they just happen to be our food. They should pay for them like in fish market," dagdag niya.

Bago nito, muling uminit ang usapin tungkol sa pagkuha ng mga mangingisdang Tsino ng mga taklobo sa Scarborough Shoal na sakop ng Pilipinas, pero nasa kontrol ng China.

Sa kabila nito, tinawag ni Locsin na "awful job" ang ginagawa ng China sa South China Sea.

"China is doing an awful job in the South China Sea. It's actions there have turned everyone country against it—and for what? Reefs the US will turn into glass (sand turns to glass under extreme heat) in the first 3 minutes of a conflict. A stationary weapons platform is suicide," ayon sa kalihim.

 

 

-- FRJ, GMA News