Muling ibinalik ang Metro Manila at iba pang mga probinsiya sa modified enhanced community quarantine (MECQ) matapos na manawagan ang mga medical frontliner ng "time out" sa gitna ng COVID-19 crisis. Nakatulong ba ang pagbabalik sa MECQ, lalo na sa pagbawas ng kaso ng mga tinamaan ng sakit? 

Sa Unang Hirit nitong Martes, sinabi ni Dr. Mario Panaligan, presidente ng Philippine College of Physicians, na hindi pa lubusang makikita sa ngayon ang epekto ng MECQ sa pagdami o pagbawas ng mga kaso ng COVID-19 dahil mayroon pang incubation period ng isa hanggang dalawang linggo ang sakit na ito.

Gayunman, inaasahan na mababawasan ang mga kaso.

"Hopefully itong mga susunod na araw mas mababawasan pa 'yung numero," sabi ni Panaligan.

Naintindihan naman daw ng hanay ng mga doktor, nurse at iba pang nasa healthcare na mahalaga rin ang kabuhayan kaya pabor sila na muling magbukas ang ilang mga negosyo pagkatapos ng MECQ.

"Nakipag-usap din kasi kami pagkatapos ng MECQ na maumpisahan 'yon. Marami ho kaming nakausap na mga grupo, hindi lang gobyerno, pati business groups. Nagkausap kami, kailangan nating tugunan kung ano 'yung dapat na matugunan agad pero hindi natin kalimutan na dapat hindi pa rin mawawala 'yung pinagkakabuhayan ng maraming tao," ani Panaligan.

Inihayag ni Panaligan na mahalaga ang koordinasyon sa pagitan ng mga medical frontliner at ng mga departamento ng gobyerno.

Nitong Lunes, umabot na sa 138,638 ang bilang ng mga kumpirmadong kaso ng COVID-19 matapos makapagtala ang Department of Health ng 6,958 na mga bagong kaso.

Ang mga gumaling ay 68,159 na habang 2,293 na ang mga namatay. —Jamil Santos/KG, GMA News