Sa kabila ng kanilang hectic schedule bilang artista, pursigido pa rin ang ilang Kapuso stars na makapagtapos ng pag-aaral at makakuha ng diploma dahil "education is the key to success." Kaya ang ilan sa kanila, naging mag-schoolmates pa.
Sa ulat ng GMA News "Unang Balita" nitong Huwebes, sinabing mag-schoolmates sina Mikael Daez at Janine Gutierrez sa Ateneo de Manila University.
Nakapagtapos na may degree in European Studies si Janine habang Business Administration naman ang natapos ni Mikael.
Proud graduates naman sina Yasmien Kurdi at Valerie Concepcion ng Arellano University.
May Latin Honors si Yasmien na nagtapos bilang Magna Cum Laude sa kurso niyang Political Science. Samantala, nakapagtapos naman si Valerie ng Bachelor of Arts, Major in Psychology.
Schoolmates din ang mag-love team na sina Ken Chan at Rita Daniela sa De La Salle-College of Saint Benilde.
Nag-college naman sa si Marian Rivera sa De La Salle University-Dasmariñas at nakatapos ng kursong Psychology. Nasa parehong paaralan din si Miguel Tanfelix na kumukuha sa kasalukuyan ng Entrepreneurial Management.
"For me hindi naman dapat talaga pinapabayaan 'yung pag-aaral. Very important 'yun sa akin dahil lumaki ako sa family na daddy ko teacher-director ng school, mommy ko nag-teacher din siya, lola ko teacher, so very important sa amin 'yung pag-aaral," saad ni Miguel.
Green Archers naman sina "Madrasta" stars Arra San Agustin at Juancho Trivino. Tapos si Arra ng kursong Psychology, habang nag-aaral si Juancho ngayon sa kursong Business Management. —Jamil Santos/LBG, GMA News
