Ngayong Valentine's Day, may payo si Rachelle Ann Go sa single ladies kung paano nila hahanapin ang kanilang future partner, at kung paano nila ihahanda ang sarili.

"Alam mo, importante talaga sa mapapangasawa, maka-Diyos. Sa lahat ng single ladies out there, you have to choose a Godly man. Sobrang importante, because life is already complicated," saad ni Rachelle sa media conference ng kaniyang Rachelle Ann Go: The Homecoming concert.

Inilahad ni Rachelle kung ano ang "special" sa asawa niyang si Martin Spies.

"Feeling ko kapag hindi kayo kapareho ng faith, medyo magulo talaga. So ako, sobrang bait, very patient, very supportive, naku sobra."

Para kay Rachelle, kailangan munang maging "The One" para sa sarili.

"To all the single ladies out there, there's no such thing as 'The One.' You have to be 'The One' for that person. You have to prepare yourself to be 'The One,'" anang international theater actress.

Dagdag pa ni Rachelle: "Ako, naisip ko 'yan eh, kasi dumating ako sa point na ang dami kong dinate (date) 'di ba? Tapos dumating ako sa point na 'Pagod na ako, lahat pare-pareho!' Nasaktan talaga, tapos sabi ko 'Ayoko na.' Tapos nag-focus talaga ako noon sa trabaho, nag-focus ako sa growing spiritually. At doon siya pinakita ni Lord na 'Ting!' Ready."

Kung dati raw, ang mga dine-date niya lang noon ang kaniyang ipinagdarasal. Pero taong 2016 nang matuto si Rachelle na ipagdasal ang sarili, pati na rin ang kaniyang future husband.

"Naalala ko I was on a plane, I was writing, sabi ko 'Lord, this is the first time I am writing this down, sabi ko, prepare me to be a good wife, to be a good mom. And sabi ko, 'yung husband din. When You think I'm ready Lord, ipakita niyo na Lord.' So du'n, nangyari lahat sa New York."

Nagkakilala sina Rachelle at Martin sa New York noong kaniyang Miss Saigon tour sa Broadway.

"So ayan, to all the single ladies, 'wag magmadali," sabi ni Rachelle.

"Kasi we sometimes feel like, we feel alone, we feel lonely, kailangan natin ng partner sa buhay. Do not waste your time dating people. You have to really spend time with yourself being single. Enjoy that moment, 'cause once you're married, married ka na 'di ba, so 'wag magmadali," dagdag pa niya.

Ngayong Pebrero 14, Araw ng mga Puso gaganapin ang kaniyang "Rachelle Ann Go: The Homecoming" concert sa Marriott Grand Ballroom sa Resorts World Manila.--FRJ, GMA News