Ipinamalas ng isang kilalang Tiktoker na Canadian-Egyptian ang kaniyang galing sa pagta-Tagalog o Filipino na bunga ng kaniyang sariling sikap tulad ng panonood ng teleserye.

“Maraming tao ang nag-comment sa mga TikTok ko na natutunan ko mag-Tagalog mula sa aking jowa, best friend, Pinoy best friend, o mga Pinoy kaibigan ko. Pero hindi totoo 'yun, guys," sabi ng influencer na si Diana Gabra sa isa niyang teaser video sa "Mars Pa More."

“'Yung totoo, natuto ako ng Tagalog sa sarili ko. Ito na 'yun. Effort ko talaga. Pero siyempre naman, ibinigay ko mga practice ko rin sa mga aking Pinoy na kaibigan at saka sa TikTok Live... Nag-practice ako dito maraming beses. Loves you. Mahal kita,” dagdag ni Diana.

Sa husay sa pagta-Tagalog ni Diana, na nasa Turkey, humanga at naaliw sa kaniya ang hosts ng programa na sina Iya Villania at Camille Prats nang kamustahin siya.

Ayon kay Diana, minsan na siyang nakabisita sa Pilipinas sa tulong ng kaniyang best friend na Pinay sa Canada, at nanatili siya sa bansa ng isang buwan.

“Nakapunta ako sa Pinas noong summer 2018. Sobrang maganda diyan. Parang paradise," sabi ng Tiktoker.

“Actually wala po akong makilala dati sa Pinas pero meron akong isang Pinay best friend sa Canada. So, nakapunta ako kasama niya sa Pinas. Kasi gusto ko 'yung experience, naligo ako maraming beses, maraming things about the Philippines na nakita ko sa telenovelas,” ani Diana.

“Actually, nag-aral ako ng Tagalog hindi lang sa Pinas, pero before going to Philippines, meron akong Pinoy na kaibigan. Nag-practice ako konti lang Tagalog tapos nakita ko sa mga telenovela," dagdag niya.

Mas nahasa pa si Diana nang makausap pa niya nang aktuwal ang mga Pinoy, na marunong ding mag-Ingles.

“'Pag nasa Pinas ako, sobrang mahina, hindi mahina, pero mas mahina 'yung Tagalog para sa akin kasi 'yung mga tao nagsalita sila Taglish, English 'tsaka Tagalog. So, nag-practice ako doon," kuwento niya.

"Tapos mga telenovela talaga, kasi adik ako sa mga telenovela, Pinoy movies,” aniya.

Nakabakasyon ngayon si Diana sa Turkey at nag-aaral na magsalita ng Turkish.

“Ang mga tao dito hindi sila magaling mag-English. So, nag-practice ako 'yung Turskish ko from telenovelas too,” kuwento niya.

Iba't ibang lengguwahe na raw ang alam ni Diana.

“Mga lenggwahe na kaya ko ay English, French, Arabic, tapos siyempre naman Tagalog, ngayong Turkish, tapos konti lang Spanish,” saad niya.--FRJ, GMA News