Inihayag ni Julie Anne San Jose na naiinis siya kay Rayver Cruz kapag hindi kaagad nag-reply sa kaniya. Pero ang binata, may paliwanag na tanggap naman ng dalaga.
“Naiinis ka kay Rayver kapag?” tanong ni Tito Boy Abunda kay Julie sa Fast Talk segment ng “Fast Talk with Boy Abunda” nitong Huwebes.
“Kapag hindi siya nagre-reply,” tugon ni Julie.
“Tito Boy, alam naman ng lahat na sobrang gamer ako,” natatawang depensa ni Rayver sa sarili. “Two minutes lang po ‘yun kapag hindi ako nagre-reply.”
Pero pagkontra ni Julie, hindi lang inaabot ng dalawang minuto ang hindi pagre-reply ni Rayver.
“Grabe hindi kaya two minutes ‘yon!” sabi ni Julie kay Rayver. “May times [na matagal] pero okay lang naman. Mahilig kasi siya sa gaming.”
Pero sabi ni Rayver sa dalaga, “Itatapon ko na ‘yon! Ikaw lang ang kailangan ko.”
Sa kabila nito, wala namang plano si Julie na pilitin si Rayver na alisin ang pag-o-online games ng binata.
“Huwag, kasi I know that you love it too, so I’m not gonna take that away,” anang Asia’s Limitless Star sa Kapuso actor.
Sa unang pagkakataon, magtatambalan sina Julie at Rayver sa pelikula na “The Cheating Game.”--FRJ, GMA Integrated News
