Mga Pinoy na nasawi sa Maui wildfires sa Hawaii, umakyat na sa 29

Iniulat ng mga awtoridad sa Maui, Hawaii na nadagdagan pa ng 10 ang mga Pinoy na nasawi sa nangyaring wildfire noong Agosto 8.

Sa kabuuan, 29 na ang mga Filipino at Filipino-American na nasawi sa nangyaring trahediya na kumitil sa 97 katao.

Ang mga biktima na bagong natukoy ay pitong miyembro ng pamilya Quijano at dalawa naman sa pamilya Recolizado.

Mula sa Ilocos ang mga Quijano na kabilang sa mga nasawi ay sina Adela Quijano Villegas, mister niyang si Joel Villegas, Felimon Quijano, Junmark Geovannie Quijano, Angelic Quijano Baclig, Lydia Coloma at Luz Bernabe.

Lumalabas sa imbestigasyon na nasa sasakyan ang mga biktima nang makulong sila ng apoy.

Dahil matindi ang pagkakasunog ng mga biktima, kinailangang isailalim sa DNA test at ibang paraan ang mga labi upang matukoy ang kanilang pagkakakilanlan.

Sa pamamagitan ng DNA test natukoy ang dalawang biktima na miyembro ng pamilya Recolizado na sina Maria Victoria Recolizado, 51, at Justine Recolizado, 11. Nasawi rin si Eugene Recolizado.

Mula sa San Juan City sa Metro Manila ang mga Recolizado.

Kasama rin sa mga nasawi si Reveling Tomboc, 81, ina ng isa pang biktima na Bibiana Tomboc Lutrania.

Isa pang Filipino na hindi pa nakikita ay si Allen Constantino, anak ni Leticia Constantino, na nasawi rin sa wildfires.

Ayon sa County of Maui, 89 sa 97 nasawi ang natukoy na ang pagkakakilanlan.

Hinikayat naman ng Maui Police Department ang publiko na iulat sa kanila ang mga nawawala pang kamag-anak.

Isang makeshift memorial ang itinayo ng mga taga-Lahaina, malapit sa pinangyarihan ng wildfires na tumupok sa nasa 2,000 kabahayan at mga establisimyento.

Narito ang listahan ng mga Filipino at Filipino-American na nasawi sa naturang trahediya:

    Rogelio Mabalot Sr, 68
    Salvador Coloma, 77
    Rodolfo Rocutan, 76
    Conchita Sagudang, 75
    Danilo Sagudang, 55
    Alfredo Galinato, 79
    Carlo Tobias, 54
    Pablo Pagdilao, 75
    Narciso Baylosis, 67
    Vanessa Baylosis, 67
    Eugene Recolizado, 51
    Joseph Lara, 86
    Glenda Yabes, 48
    Buddy Jantoc, 79
    Leticia Constantino, 56
    Raffy Imperial, 63
    Bibiana Tomboc Lutrania, 58
    Reveling Baybayan Tomboc, 81
    Maurice Buen, aka Shadow, 79
    Marilou Dias, 60
    Maria Victoria Recolizado, 51
    Justine Recolizado, 11
    Adela Quijano Villegas, 70
    Joel Villegas
    Felimon Quijano
    Junmark Geovannie Quijano
    Angelic Quijano Baclig
    Luz Bernabe, 65
    Lydia Coloma

—FRJ, GMA Integrated News