Viral ngayon sa social media ang ginanap na kasalan sa San Jose Parish Church sa La Trinidad, Benguet noong buwan ng Hulyo.

 

Sa halip kasi na mga bulaklak ang dekorasyon sa simbahan ay mga berdeng gulay ang ginamit.

Ang nilakaran ng bride, mga abay, ninong at ninang ay may mga gulay rin tulad ng repolyo, broccoli at cauliflower.

Ayon sa mag asawang sina Claver at Fleann Molot, idea raw ito ng kanilang tiyahin.

Hindi naman raw nila ito tinanggihan dahil bukod sa kakaiba ito ay pagsasaka rin ng gulay ang kanilang ikinabubuhay.

Masaya ang mag asawa dahil hindi nila akalaing mapapansin ang kanilang simpleng kasal hanggang sa mag viral ito sa social media.

Ayon pa sa mag asawa, hindi naman raw nasayang ang mga gulay na ginamit na dekorasyon dahil ipinamigay ito sa mga dumalo sa kasalan.

Malaki rin raw ang kanilang natipid dahil hindi na sila bumili ng iba pang palamuti.

Hinding hindi raw nila makakalimutan ang kanilang pagiisang dibdib. — BAP, GMA News