Dahil nasa bahay lang ang mga tao bunga ng lockdown para makaiwas sa coronavirus disease 2019 (COVID-19), malaking tulong ang mga food rider at restaurant para makapagpahatid ng pagkain. Iyon nga lang, nagiging biktima rin sila ng mga taong mapagsamantala at walang magawa sa buhay.

Tulad ng nangyari sa restaurant owners na sina Sasah at Junar Santias, na pasara na sana ang kainan nang makatanggap sila ng order na aabot sa P1,000, ayon sa ulat ni Shai Lagarde sa "Stand For Truth."

Pero nang malapit na ipinadalang order, nakatanggap sila ng mensahe sa kostumer na ipinapa-cancel na ang order.

Ayon kay Junar, bumalik ang food rider na basa sa ulan at masama ang loob.

"Malungkot na malungkot kami noong gabi na 'yun kasi buong araw namin kinita 'yun," sabi ni Junar.

Ipinost nila sa social media ang kanilang karanasan para magsilbing babala rin sa ibang katulad nilang negosyante.

Ang kanilang post, umani ng simpatiya at may nagkaloob ng tulong. Pero dahil ayaw na rin naman ng rider na tumanggap ng pera, ginamit nila ang donasyon para makapagluto ng binalot meals na ipinadala nila sa mga frontliner.

Si Jamaica Dee, na mayroon ding food delivery bussiness,  mahigit P3,000 ang nawala dahil din sa mga nanlolokong umu-order.

Kuwento niya, hinihingan nila ng valid ID ang mga umoorder sa kanila bilang pag-iingat. Pero ang ipinadalang ID, nakuha lang pala ng nagpanggap na kostumer sa internet.

Ang food rider na si Mang Romano, inabot daw ng isang oras para kunin ang pagkain at isang oras para maihatid sa umorder. Isang oras din ang ginugol niya para makontak ang sinasabing nag-order.

Pero nang dumating ang tao na nakita sa ID, sinabi nito na wala siyang inoorder.

"Ako po ay 49 years old at maraming anak na binubuhay. Sana hindi na nila gawin sa iba, nakakapagod," hinanakit ni Mang Romano.

Ayon kay Jamaica, sinagot niya ang P3,000 ginastos ni Mang Romano na gawa ng manlolokong umorder.

"Kawawa po 'yung rider kung ibabawas namin sa kaniya. Nasa three to four days kinikita ng rider 'yon," saad niya.

Dahil sa insidente, binago ni Jamaica ang patakaran sa pag-order sa kanila. Kailangan na ng selfie ng costumer at hindi na ID.

Kung aabot sa P2,000 ang order, dapat magbayad via online.

Maliban sa mga biglang kina-cancel o nanlolokong order, mayroon ding ginagamit sa biro ang pagpapadeliber ng pagkain.

Gaya ni Bernard Enriquez na nakatanggap ng delivery ng mga lutong manok at halo-halo para sa isang tao na hindi naman niya kasama sa bahay.

"Alam ko na scam ang delivery niya kasi may dalawa nang nauna sa kanya looking for Jane Castro. Walang nakatira dito na nagngangalang Jane Castro," kuwento niya.

Umabot daw sa P5,800 ang order.

Para matulungan ang naghatid ng pagkain, nag-ambagan na lang umano ang mga magkakapitbahay.

"Sa awa namin doon sa driver, kasi more than one and a half hours siyang pumila sa fast food chain, nag-ambagan 'yung mga kapitbahay dito. It's a big loss for them. Wala dapat nanloloko," sabi niya.

Dahil sa mga ganitong insidente, pinayuhan ni Department of Trade and Industry undersecretary Ruth Castelo ang mga nasa e-commerce na maging maingat at gumamit ng lehitimong online payment gateways.

"Kailangan rin nila proteksyunan 'yung negosyo nila," paalala niya. --FRJ, GMA News