Sobrang singil umano ng SSS sa salary loan, nais paimbestigahan sa Kamara

Ilang kongresista ang nais paimbestigahan ang natuklasan ng Commission on Audit (CoA) na umano’y sobrang paniningil ng Social Security System (SSS) sa mga miyembro nito na mayroong salary loan. Ayon kay Bohol Rep. Erico Aumentado, mayroong hindi tama sa naturang transaksiyon ng SSS kaya maghahain siya ng resolusyon para maimbestigahan ang ulat ng CoA tungkol sa sobra umanong singil ng SSS na umaabot sa P788 milyon hanggang nitong 2011. "I will gather some more data on this SSS caper. I may file a resolution seeking an investigation in aid of legislation," ayon sa mambabatas. Maging si Maguindanao Rep. Simeon Datumanong ay naniniwalang dapat ibalik sa mga miyembro ang sobrang singil at ginamit na puhunan ng ilang opisyal ng SSS sa pinasok na investment. Sa ilalim umano ng batas, maaaring gamitin ng SSS ang hanggang 10 percent ng “investible fund" para sa inutang ng kanilang mga miyembro. Ngunit lumilitaw umano sa records na humigit dito ang SSS. "This fact of over-charging members look like act of graft and corruption and should be investigated," pahayag ni Datumanong, dating kalihim ng Department of Justice. Iginiit naman ni Zambales Rep. Mitos Magsaysay na dapat ituwid ng SSS ang pagkakamali sa kanilang pagkwenta sa salary loans na taliwas sa itinatakda ng Bangko Sentral ng Pilipinas. “The availment of salary loans that is payable in reasonable terms is among the major benefits of members of the SSS. This is the reason members pay their monthly premium religiously. It is the agency’s duty to adhere to government set rules and regulations to provide that," ayon sa mambabatas. “They should return the excess perhaps through reductions in the monthly dues of their members so long as the overcharged amount is refunded to them in some way," dagdag pa niya. Sa ulat ng Balitanghali nitong Martes, inirekomenda ni CoA Commissioner Heidi Mendoza na ibalik ng SSS sa mga miyembro ang sobrang singil. Paliwanag ng opisyal, higit sa halagang pinag-uusapan, dapat bigyan ng konsiderasyon ang pahirap sa mga miyembro ng SSS sa nangyaring labis na singil sa interest. Pero iginiit naman ni Ma Luz Generoso, Head for Lending and Asset Management Division ng SSS, na hindi sila naningil ng sobra sa kanilang mga miyembro. Sa halip ay kinuha lang nila “in advance" ang interest ng inutang sa unang taon ng pagbabayad. Ayon kay Magsaysay, ang natuklasan ng CoA ay masaklap na katotohanan na batid ng SSS members ang halaga ng kanilang inuutang pero hindi ipinapaalam sa kanila ang kuwenta ng dapat nilang bayaran. “On the part of consumers and SSS members, perhaps this is a lesson that they need to be more vigilant with regard to the terms of their loans and bills. They need to scrutinize what they are paying for because the money that they use to pay for them are not easy to come by," payo niya. Suportado rin ni CIBAC party-list Rep. Sherwin Tugna ang gagawing imbestigasyon sa CoA at nanawagan sa SSS na isauli sa mga miyembro ang sobrang singil sa interest. "This is a complete act of negligence, making them liable for restitution of overcharged interest rates and damages," ani Tugna. Dagdag pa niya, “SSS should always bear in mind that as a GOCC, it should always impose interest rates that are lower than prevailing market rate. It exists by law not solely for profit, it is to serve its contributors so the interest charges should be lower." - PR/FRJ, GMA News