Pagbuo ng task force na sisiyasat sa Davao blast, iniutos ng DOJ chief

Iniutos ni Justice Secretary Vitaliano Aguirre nitong Sabado ang pagbuo ng task force na magsisiyasat sa naganap na pagsabog sa Davao City nitong Biyernes na ikinasawi ng 14 katao at ikinasugat ng mahigit 60 iba pa.

Tiniyak ni Aguirre na makikipagtulungan ang Department of Justice sa National Bureau of Investigation (NBI) at iba pang law enforcement agencies para matukoy at makasuhan ang mga nasa likod ng pagsabog sa Roxas Night Market.

"I have instructed NBI Director Dante Gierran to give me a list of crack NBI operatives who will join our prosecutors in the fact finding investigation of this incident," anang kalihim.

"We will cooperate with the other law enforcement agencies on this concerted effort to flesh out the persons responsible," dagdag pa niya.

Pagtiyak pa ni Aguirre, "The perpetrators will be brought to justice. We are one with the President in this fight against terrorism and lawlessness.”

Una rito, sinabi ni Philippine National Police chief Director General Ronald dela Rosa na hindi pa nila batid kung sino o anong grupo ang nasa likod ng pagsabog habang hindi pa natatapos ang post-blast investigation ng pulisya.

Kasabay nito, mayroon umanong apat na "person of interest" na tinututukan ang pulisya.

Sinabi naman ni Davao City Mayor Sarah Duterte na mayroon ding binuong task force na kinabibilangan ng mga pulis at militar para magsiyasat na nangyaring krimen. —FRJ, GMA News