80% ng manok sa ilang merkado sa NCR, apektado ng isang uri ng bacteria

Pinapayuhan ng Department of Health ang mga Pinoy na mahilig sa manok na magdoble-ingat sa paghahanda ng chicken-based na ulam dahil sa umano'y kontaminado ng isang bacteria ang mga karneng manok na ibinebenta sa ilang palengke sa National Capital Region.

Sa ulat ng "Unang Balita," sinabi ng DOH na ayon sa pag-aaral ng University of the Philippine-Institute of Biology, natuklasan ang bacteria na tinatawag na "Campy-lobacter" bacteria na umaatake sa 80 porsiyento (o walo sa 10) ng mga manok na ibinebenta sa ilang pamilihan sa Kamaynilaan.

Nilinaw naman ng DOH na walang malubhang epekto ang bacteria sa tao at hindi ito nakamamatay.

Pero, maaari umano itong maging sanhi ng pananakit ng tiyan at diarrhea kapag nakapasok sa katawan ng tao.

Ayon sa ulat, hindi pa matukoy kung saan nakukuha ng mga manok ang nasabing bacteria.

Payo ng mga eksperto, linisin at lutuing mabuti ang mga karne ng manok upang mapuksa ang bacteria, dagdag ng ulat. —LBG, GMA News