Tween star Bea Binene, napiling ambassador ng Plan International

Napili kamakailan ang Tween star na si Bea Binene bilang ambassador ng Plan International, isang climate change awareness program. Ayon sa ulat sa Chika Minute ng "24 Oras" noong Miyerkules, ipaparating daw ng aktres sa mga kabataan ang impormasyon at epekto ng climate change.   Para kay Bea, mahalaga raw na magkaroon ng sariling kaalaman at aksyon ang mga kabataan tungkol sa climate change. Isa sa mga paraang naisip ni Bea upang ikalat ang pagkakaroon ng kaalaman tungkol sa naturang paksa ay ang paggamit ng mga social networking sites. Wika pa ng aktres, "A lot of people are on Facebook [and] on Twitter. Parang sasabihin ko sa social networking sites na yon, na kung ano yong kahalagahan ng awareness na to." - Mac Macapendeg, VVP, GMA News