Lovi Poe, Kapuso pa rin; pumirma ng panibagong 3-year exclusive contract sa GMA Network

  Mananatiling Kapuso ang aktres na si Lovi Poe matapos siyang pumirma ng panibagong 3-year exclusive contract sa GMA Network nitong Biyernes.   Dumalo sa contract signing ang mga GMA executives na sina Atty. Felipe L. Gozon, Chairman and CEO; Ms. Lilybeth G. Rasonable, Officer in Charge of Entertainment; Ms. Cheryl Ching-Sy, AVP for Drama at Ms. Gigi Lara, AVP for Alternative Programming.   Ayon sa aktres, masaya siya sa muling pagpirma ng kontrata dahil nasa GMA ang kanyang puso dahil dito siya nagsimula.   “Ako, I started here in GMA, so that’s the first thing naman na iniisip ko about renewing. It’s not about anything else. It’s not just like that. Ako, my heart is here din naman,” paliwanag ni Lovi sa showbiz press.   Excited na rin daw siyang gumawa ng bagong proyekto: “Excited akong gumawa ulit ng teleserye, namiss ko na rin. We’re gonna talk about it soon. We’re gonna meet about ‘yung next drama na gagawin ko and I missed everyone dito sa GMA- ‘yung mga staff, crew and kapwa ko artista.”   Dagdag ng dating lead star ng afternoon series na Yesterday’s Bride, nais pa rin niyang gumawa ng mga drama  at maging action projects.   Handa rin umano ang dalaga na makapareha ang sinumang aktor na itatambal sa kanya.   Pagdating sa napapabalitang espesyal na lalaki sa buhay ni Lovi na si Rocco Nacino, sinabi ng aktres na, “We’re friends. I just wanna focus muna talaga (sa trabaho). Ito yung pinromise ko sa sarili ko. I’m already 24, so ibang Lovi na ‘to, mas mature na.” -- SPortillo/FRJ, GMA News