Barbie Almalbis, Kitchie Nadal, Up Dharma Down nagtanghal sa Fete De La Musique

Bigay todo ang mga performers na lumahok sa katatapos na Fete De La Musique Music Festival sa Makati City na idinaos nitong Sabado, kabilang na sina Barbie Almalbis, Kitchie Nadal at ang grupong Up Dharma Down. "All the people's love for the music itself... It kept the spirit going for so many years. More than 13 years already. It's one event that a lot of the audience and musicians are looking forward to doing every year and it gets bigger every year," pahayag ni Papadom, founder ng Tropical Depression. Ayon sa ulat ni Katrina Son sa Balitanghali nitong Lunes, hindi lamang ang mga performers na nagpasiklab ng kanilang talento kundi maging ang mga manonood na may impromptu performance kasabay ng musika sa nasabing event. Bukod sa OPM narinig din sa Fete De La Musique ang mga awitin ng pumanaw na King of Pop na si Michael Jackson bilang paggunita sa kanyang ika-apat na death anniversary at gayundin ang ika-30 na taong anibersaryo ng kanyang album "Thriller," na masasabing nagbigay sa kanya ng kasikatan. Ginaganap ang Fete De La Musique sa France at sa iba't-iba pang parte ng mundo taun-taon tuwing Hunyo 21. Ani Arnaud "Nono" Censier ng Tropical Depression, "You can see all the people, the kids, 15 years old, put amplifier on the street... Everybody plays in their bar, it's full [of people] everywhere and it's a really nice day." "It was a very intimate gathering in the Remedios circle. We had about three bands playing," kwento ni Papadom. — Mac Macapendeg/BM, GMA News