Lady Gaga, nagsuot ng custom-made ‘Filipiniana’ gown

Nagsuot ng custom-made 'Filipiniana' inspired gown ang controversial singer-performer na si Lady Gaga sa unang gabi ng kanyang concert sa Pilipinas nitong Lunes. Kumalat sa Twitter, isang social networking site, ang mga litrato mula sa naturang concert kung saan suot nito ang ‘Filipiniana’ gown na gawa ng Armani, kilalang clothing line sa buong mundo.  

Naging laman ng balita ang pagdating ni Lady Gaga sa Pilipinas dahil mayroong mga hindi pabor sa kanyang ‘image’ na umano'y kontra kay Kristo.   Isa sa mga binabatikos na kanta ni Lady Gaga ay ang kontrobersyal na awitin niyang ‘Judas’ na umano'y ‘satanic’ ang mensahe.   “I’m not a creature of your government, Manila" pahayag ni Lady Gaga sa kanyang concert bago niya kinanta ang kontrobersyal na awitin.   Bagamat nagkaroon ng mga pagbatikos laban sa pagtatanghal ni Lady Gaga, tuloy pa rin ngayong Martes ng gabi, Mayo 22, ang pangalawa at huling concert niya sa Pilipinas. Muli itong gagawin sa MOA Arena sa Pasay City. -- Mac Macapendeg/FRJ, GMA News