Pinoy films, may 8 nominasyon sa unang ASEAN International Film Festival and Awards -- report

Nakakuha ng walong nominasyon ang mga pelikulang Pilipino na inilahok sa 1st ASEAN International Film Festival and Awards (AIFFA) na ginaganap ngayon sa Malaysia. Sa PEP Alert ng Philippine Entertainment Portal, sinabing nominado bilang Best Actor si Jericho Rosales para sa pelikulang Alagwa, at nominado namang Best Actress si  Alessandra de Rossi para sa Sta Niña. Nominado rin si  Bugoy Carino bilang Best Supporting Actor para sa Alagwa, at ang batikang si Anita Linda ay nominado bilang  Best Supporting Actress para sa Sta Niña. Basahin: Ricky Davao to judge in the first Asean International Film Festival & Awards Pasok din sa nominasyon para sa Best Film (Drama) at Best Editing ang Sta Niña na idinerek ni Manny Palo, na nominado rin bilang Best Director. Nominado naman bilang Best Film (Comedy)  ang Mga Kidnapper Ni Ronnie Lazaro,  na idinerek ni Sigfreid Barros Sanchez. Sinimulan ang festival nitong Huwebes sa Sarawak Cultural Village sa Kuching, Malaysia, kung saan 100 pelikula mula sa iba't ibang bansa sa Asean ang kalahok. Umabot sa 13 Pinoy indie films ang inilahok ng Pilipinas sa naturang festival na tatagal hanggang Sabado. Nag-iisang Filipino jury sa nasabing festival ang actor-director na si Ricky Davao. - FRJ, GMA News