Solusyon sa oil price hike, hiningi ni PNoy sa eco team

MANILA – Inatasan ni Pangulong Benigno “Noynoy" Aquino III ang kanyang economic team na magpresenta ng solusyon kung papaano matutulungan ang publiko sa tumataas na presyo ng mga produktong petrolyo. Ito ang inihayag ni Budget Secretary Florencio Abad nitong Miyerkules, isang araw matapos lagdaan ni Aquino ang Executive Order No. 32 na naglalaan ng P450 milyong fuel subsidy para sa mga pampublikong jeepney at tricycle. “We have to go back and study the matter and report back to him and recommend measures to him soon," pahayag ni Abad sa media. Idinagdag ng kalihim na nais ng pangulo na makahanap ng solusyon para mapagaang ang mabigat na pasanin ng publiko sa sunod-sunod na pagtaas ng presyo ng mga produktong petrolyo. “So in case the situation continues on, if it gets even worse, we ought to be ready to prepare with some measures so that we can alleviate whatever additional burdens the situation may bring to our people," paliwanag ni Abad. Bagaman marami umanong iniisip na paraan ang economic team kung papaano makapagbibigay ng tulong sa mga apektadong sektor, hindi umano kasama rito ang pag-alis sa expanded value added tax (VAT) sa langis. “The economic advisers advised him that reducing the VAT may not be the most direct and effective way of helping our people. It might even have some adverse consequences on our fiscal position," ayon sa kalihim. Nitong Martes, sinabi ni Senate Minority leader Sen Alan Peter Cayetano, na may paraan upang bawasan ang singil sa buwis ng langis na hindi lubos na maapektuhan ang koleksiyon ng pamahalaan. Idinagdag ng senador na dapat maisip ng gobyerno na mayroon ding epekto sa gastusin ng pamahalaan ang nagaganap na oil price increases tulad ng gastusin sa konsumo ng gasolina sa mga government vehicles at mga infrastructure projects. Hindi man nilinaw ni Abad, sinabi nito na kabilang sa mga paraan na naiisip ng gobyerno ay ang pagkakaloob ng pinansiyal na suporta. “As much as possible it should not have an adverse impact on the fiscal position as well as on the deficit and have direct effect on the people," ayon sa kalihim. – GMA News