DepEd XI: Public Schools sa Davao City, kulang ug sobra 800 ka classrooms

Ang Don Manuel Gutierrez Sr. Elementary School sa Matina, Davao City ang usa lamang sa mga eskwelahan nga hangtud karon nakasinati ug problema sa kakulangon ug mga classrooms. Sa miaging school year 2009-2010, dunay 37 ka klase ang Don Manuel Gutierrez Sr. gikan Grade 1 ngadto Grade 6, apan dunay 28 lamang ka mga classrooms ang maong tulunghaan. “Gani kini stage ni dati among gitambakan ug yuta aron mahimong classroom kay kulang gyud ba", saysay ni Juanita Bandayanon, principal sa nahisgutang tulunghaan. “Wala sab Science Laboratory ug Home Economics room ang among eskwelahan, gitunga na ang klase sa buntag ug hapon ang matag klase mokabat singkwenta ka estudyante pero moabot gihapon saisenta ka mga estudyante ang naa sa amoa karon", dugang ni Bandayanon. Susamang problema ang nabati sa eskwelahan sa bukirong bahin sa Davao City sama sa Upian Elementary School sa Sitio Upian Marilog, Marilog District. Aron maigo ang unom ka klase sa upat ka classrooms, gi-usa na lang ang Grade 3 ug Grade 4, samtang ang Grade 5 ug Grade six, giusa ra sab. Sa maong sitwasyon ilang magtutudlo kuno ang hilabihang nalisdan ug seguradong apektado usab kuno ang pagtuon sa mga estudyante. “Lisud gyud, kay ako-ang Grade 1 last year 63 lang to pero guot na siya, how much more karon", kabalaka ni Cherry Labawan, Grade 1 Adviser sa Upian Elementary School. Sumala ni Dr. Susana Estigoy, Regional Director sa Department of Education, nga sa Davao City, 399 ka mga classrooms sa elementarya nga kinahanglan unta matukod karong tuiga ug 473 sa high school apan dili gayud kini mapatuman gilayon. “Tungod sa kakulang sa budget sa Deped gikinahanglan una nga maghulat ang mga eskwelahan sama sa Davao City tungod bisan ang Deped ang usa sa mga ahensya sa gobyerno nga dunay pinakadaku nga budget apan kulangon pa gihapon", dugang ni Estigoy.