Mayor Duterte-Carpio andam na kung unsay dangatan sa kaso

Subling gitubag ni Davao City Mayor Inday Sara Duterte-Carpio ang isyu batok kaniya sukad nahitabo ang pagpanumbag niya ngadto kang Court Sheriff Abe Andres niadtong Hulyo 1 atol sa demolisyon sa Soliman Agdao, Davao City. Buot klarohon sa Mayor nga walay kamatuoran ang migulang isyu nga walay padulngan ang imbestigasyon sa Department of Interior and Local Government tungod suod sila nga higala ni Presidente Noynoy Aquino. “Definitely dili mi igsoon, dili mi kabarilan, dili mi amigo. Ang among relationship is purely professional. Him as the President of the Philippines and I as City Mayor of Davao City. In fact we only see each other during official functions. Wala mi past relationship ni President Aquino", matud ni Mayor Duterte-Carpio. Migula sa 18 ka pahina nga resulta sa fact-finding sa DILG nga sad-an si Duterte-Carpio sa pagpanumbag ug dunay “probable cause" nga kasuhan ug administratibo. Apan dili direktang mupahamtang ug silot ang DILG sanglit wala mipasaka ug kaso si Court Sheriff Abe Andres. Nasuta usab nga dunay tulubagon si Judge Emmanuel Carpio sanglit wala niini gituman ang traynta ka adlaw nga lugway gikan pagpagula sa Writ of Demolition hantud sa pagpatuman na sa demolisyon. Samtang gibarugan sa Mayor nga dili gayud niya pasayluon si Judge Carpio ug nanganti nga kung masuspende siya, angayang masuspende usab ang huwes. Wala usab siyay planong makigistorya kang Carpio nga uyuan ra sa iyang bana. “Imagine, nanghangyo ko sa iyaha ug duha ka oras para maayos ug implement ang iyang Writ unya paghuman moingon siya ug ‘dili’ unya kadto diay nag issue siya ug writ nga wala lang man diay notice and hearing sa contending parties, which is a violation sa rules of procedure", pagpaklaro sa Mayor. Gilayong giadtuan sa GMA News ang sala ni Judge Carpio sa RTC Branch 16 aron makuhaan ug reaksyon apan wala kini sa iyang opisina. - GMA Davao