Nakalutan nga vintage bomb, mibusikad, 2 patay

Davao City -- Base sa inisyal nga imbestigasyon sa Buhangin Police Station, nakalutan sa tulo ka matud pa nag treasure hunting sa Barangay Mandug, Davao City ang vintage bomb kilid sa Davao River, July 20 sa buntag. Pagkakita sa nahisgutang bomba, gidala dayon kuno kini sa payag ug didto gisulayan sa tulo ug utingkay ang bomba hinungdan nga mibusikad kini. Duha ang namatay diha-diha dayon nga nailhang sila Ladislao Maayo, 50 anyos, Diosdado Maglasang, 49 anyos. Samtang samdan ang kauban nilang si Pablito Mayorhermita, 44 anyos. Matud sa Explosive Ordnance Divison (EOD) Team NH Technical Support Platoon sa Davao City Police Office nga ang bomba gigamit pa niadtong World War II. 4 feet ang gitas-on niini ug gibana-banaang 50 kilos ang kabug-at. Busa, gitambag sa otoridad nga kung dunay makalutan nga vintage bomb, dili gayud hilabtan. “Kung makakita sila ug mga metal pipe, suspected na unexploded na mga vintage bomb kung pwede dili lang nila hilabtan kay delikado na inig ma-damage, makahatag na ug danyos sa ilaha", Matud ni Police Chief Insp. Alfredo Baloran, Chief of Police sa Buhangin PNP.