'Breastfeeding contest' gipahigayon sa Maco, Comval

“Isulong ang breastfeeding, tama, sapat at eksklusibo", kini ang tema sa selebrasyon sa Nutrition Month karong tuiga. Busa sa selebrasyon niini sa Maco, Compostela Valley Province dunay contest sa breastfeeding. Gipili na daan sa Barangay Health Workers ang mga contestants niini diin gitimbang ang mga bata nga nag breastfeed ug sukdon kung sakto ba ang timbang niini kung ikompara sa kataas ug edad sa bata. Gawas niini, duna usay poster making contest. Usa ka gatos ka mga bata nga matud pa malnourished ang gipakaon usab ug lugaw atol sa maong okasyon nga gipasiugdahan sa kagamhanang lokal sa Maco ug Kiwanis Club of Golden Tagum. Samtang labing una ang Compostela Valley Province sa mga probinsyang nag organisa ug supplemental feeding program diin gigahinan kini ug P2 Million nga budget sa nasyonal nga panggamhanan. Ang maong pundo, gipalit ug mga gamit sa kusina ug mga pagkaong makapahimsog sa mga makabenepisyong mga bata gikan sa mga Day Care Centers sa Maco, Comval. - SOV, GMA Davao