Pito ka balay sa Davao City, gibanlas sa balud

Nakamata tungod sa kakusog sa hapak sa balud si Victoria Amogis niadtong Hulyo 31 sa kaadlawon ug dihang iyang gisilip gawas sa ilang balay, dunay dakong torso sa kahoy nga gianod ang balud nga nakapadugang sa iyang kakuyaw. Usa ang iyang panimalay sa pito ka balay nga nangadaut tungod sa kakusog sa balud sa Isla Suerte, Barangay 76A, Davao City. Tungod niini, namakwit una ang pamilya ni Victoria lakip ang pamilya sa usa ka Ernesto Pabroa. Bisan ang basketball court sa maong dapit, nadaut usab human naabtan sa tubig sa dagat. “Kusog kayo ang hangin. Gikuso-kuso sa dagkong balud ang among balay", matud ni Victoria Amogis. Saysay pa ni Ernesto Pabroa, “sa una, 8 years o 9 years ago pa nahitaboa ng sama niini". Sa weather forecast sa PAG-ASA XI, gipahimangnuan ang mga residenteng nagpuyo kilid sa dagat nga magbantay sa mga dagkong balud dala sa south monsoon nga epekto gihapon sa bagyong Kabayan.