PAWS, nagsagawa ng relief ops para sa mga hayop na apektado ng baha

Nagsagawa ng relief operation ang animal rights activist na Philippine Animal Welfare Society (PAWS) para sa ilang mga alagang hayop na apektado sa pinsalang dulot ng malawakang pagbaha sa Hagonoy, Bulacan, ayon sa ulat sa "Balitanghali" ng GMA News TV. Kabilang sa mga natulungan ay ang asong si Mikee na ilang araw na umanong naiwan sa bubong ng bahay. "Hinahagisan namin ng pagkain sa yero pero pagod na pagod na sila," pahayag ni Lucy Rubio, tagapag-alaga ni Mikee. Binigyan ng pagkain, chineck-up at pina-inom ng bitamina ng PAWS ang mga hayop na kanilang tinulungan. "'Yung ibang mga aso, ang tagal na daw nila nandoon. For days, walang pagkain tapos nauulanan, walang shelter. Of course hindi na nating makaka-ila na pati ang mga tao, ganoon din ang sitwasyon pero it's much worse for the animals. 'Yung mga tao who cares for the animals, 'yung mga rasyon nila ng pagkain, hinahati pa para makasama nila aso nila," pahayag ni Ana Cabrera, executive director ng PAWS.

Persona non grata Sa tindi ng pinsalang tinamo ng Bulacan dulot ng baha, nais ng gobernador ng lalawigan na ideklarang persona non grata ang mga namamahala ng Angat at Ipo dam na kanyang sinisisi sa malawakang pagbaha sa probinsya, ayon sa ulat. "This people should be declared persona non grata to the province of Bulacan. 'Yung mga nakatira sa NPC at Angat Dam, pati 'yung namumuno sa kanila. Because they are ungrateful to the people na siyang nagbibigay sa kanila ng biyaya," pahayag ni Governor Willy Alvarado. — Amanda Fernandez/RSJ, GMA News