P400-M halaga ng counterfeit items nakumpiska sa Manila port

Umaabot sa P400-milyong halaga ng “counterfeit items” o mga pekeng kagamitan ang nakumpiska sa Port of Manila ng mga ahente ng Bureau of Customs kamakailan, ayon kay Customs Deputy Commissioner for Intelligence Danilo Lim nitong Linggo. Nakalagay ang mga nakumpiskang item — counterfeit bags, pekeng cellular phone accessories at ilang gamot — sa dalawang 44-foot container vans na nakapangalan sa Imax Harbor International Trading Corp., ani Lim.   Ayon pa kay Lim, “plastic wares” ang nakasaad na laman ng container vans batay sa mga dokumento nito. Binuksan ang container vans matapos daw mapansin ng Intellectual Property Rights Division ang "marked discrepancies" sa origin at specification ng naturang shipment.   Ito ang pinakamalaking huli ng intelligence division ng Bureau of Customs mula Setyembre ng nakaraang taon, dagdag ni Lim.   “We will do everything in our power to prevent smuggled products especially those that pose a serious threat to the health of our people from entering our market,” ani Lim. Samantala, inatasan naman ni Customs chief Rufino Biazon ang paghihigpit sa border patrol ng bansa para maiwasan ang pagpasok ng counterfeit products. “I have assigned my best intelligence agents to help strengthen our common initiative on border patrol enforcement. Pagsusumikapan natin na panatilihing matatag ang mga bakod ng tuwid na daan laban sa mga smuggler at corrupt,” aniya. – Amanda Fernandez/KBK, GMA News