Kundirana ng La Salle, nakalikom ng $4K sa kanilang concert para sa 'Sendong' survivors

Nakalikom ng halos $4,000 ang La Salle Kundirana 2012 para sa mga biktima ng bagyong "Sendong" (Washi) mula sa kanilang concert na "Change the World" nitong Pebrero 17 sa Guam. Ayon sa Department of Foreign Affairs, naganap ang concert sa Phoenix Center of the Father Duenas Memorial High School sa Mangilao, Guam. "Proceeds of the concert were for the benefit of the Redemptorist Mater Archdiocesan Missionary Seminary of Guam and the victims of tropical storm Sendong (Washi)," ayon sa ulat. Inihandog ni Archbishop Anthony Apuron ang nalikom na US$3,950.40 para sa mga biktima ng Sendong matapos isagawa ang concert. Dumalo sa concert at check presentation si Philippine Consul General Bayani Mangibin at ilan pang mga Consulate officer at staff. Nakipagtulungan ang Archdiocese of Agana, La Salle Young Artists' Foundation, Inc., National Office Supply, at Bank of Guam upang maidaos ang concert sa Guam. Dumalo rin sa fundraising concert ang ilang government officials ng Guam tulad nina: Gov. Eddie Calvo, First Lady Christine Calvo at Senators of the 31st Guam Legislature — Amanda Fernandez /LBG, GMA News