3 senador, itinangging nilapitan ng Iglesia ni Cristo upang mangampanya sa pagpapawalang-sala kay Corona

Itinanggi ng tatlong senador nitong Lunes na nilapitan umano sila ng Iglesia ni Cristo (INC) upang mangampanya para sa pagpapawalang-sala ni impeached Chief Justice Renato Corona.

 

"Walang pumupunta sa akin. I quarantined myself already," ani Senate President at impeachment court presiding officer Juan Ponce Enrile sa media nitong Lunes.

 

Inihayag niya ito matapos ilabas ng Philippine Daily Inquirer ang balitang nakipagkita umano sa kanya at kay Senate President Pro Tempore Jinggoy Estrada ang mga opisyal ng Iglesia ni Cristo na sina Dan Orosa at Resty Lazaro noong Lenten break ng Senado upang pag-usapan ang kaso ni Corona.

 

Miyembro rin ng religious group si defense lead counsel Serafin Cuevas.

 

Nakasaad din sa ulat ng Inquirer na nais nina Manny Cuevas at Victor Cheng, kapwa miyembro ng Iglesia ni Cristo, na makipagkita sa iba pang mga senador upang ikampanya ang pagpapawalang-sala kay Corona.

 

Sa magkahiwalay namang panayam nitong Lunes, kapwang itinanggi nina Senador Edgardo Angara at Francis Pangilinan na nilapitan sila ng ilang mga miyembro ng Iglesia ni Cristo.

 

Samantala, inihayag ni Angara na karapatan umano ng kahit anong sibilyang grupong makipagtalakayan sa mga kinatawan ng gobyerno.

 

"I think there is nothing wrong with constituents to talk to their representative government. Hindi ba yun ang konsepto ng ating demokrasya, representative government?" aniya.

 

"People are represented by representatives and so the people and their organizations can talk to their representative" dagdag niya.

 

Ayon naman kay Pangilinan, hindi niya nais makipag-usap sa mga grupo tungkol sa impeachment.

 

Inaasahang tetestigo ngayong Martes si Corona sa Senado, na umuupong impeachment court. — Amanda Fernandez/RSJ, GMA News