Senado, bibigyan hanggang Biyernes si Corona upang magpagaling

Binigyan si Chief Justice Renato Corona ng hanggang Biyernes upang magpagaling mula sa kanyang sakit bago tumestigo muli sa Senado, na umuupong impeachment court. "This court will give you until Friday to close your evidence. After that we will consider the case submitted on the record," ani Senate President Juan Ponce Enrile, presiding officer ng impeachment court, sa pasimula ng paglilitis noong Miyerkules. "On Monday we schedule an oral argument. It will depend upon the court whether we render the judgment or postpone it for another day... [we may] make a decision on Monday or Tuesday," dagdag niya. Maagang natapos ang paglilitis nitong Miyerkules. Itutuloy ito sa darating na Biyernes alas-2 ng hapon. Bago ang paglilitis nitong Miyerkules, inihayag ni Senate President Pro Tempore Jinggoy Estrada na napagkasunduan ito ng mga senador na dumalo sa emergency caucus na naganap ngayong Martes. "We will wait for him (Corona) until Friday," pahayag niya sa media. Inihayag ni Enrile ang kanilang desisyon matapos sabihin ni lead defense counsel Serafin Cuevas na wala umano sa maayos na kalagayan si Corona upang tumestigo muli sa impeachment court. Noong Martes, humarap si Corona sa Senado upang ipagtanggol ang kanyang sarili laban sa mga akusasyong ibinato sa kanya. Pero matapos ang kanyang opening statement lumabas siya sa session hall na walang pahintulot dahil umano nakaramdam siya ng pagkahilo. Nakabalik din siya sa session hall matapos ang isang oras at naka-wheelchair na. Mula noon tumahimik na siya. Isinugod si Corona sa ospital madaling-araw nitong Miyerkules at inilagay sa intensive care unit (ICU) ng The Medical City dahil umano sa posibleng heart attack. Nakasaad na sa naunang medical bulletin na kinakailangang obserbahan muna siya sa loob ng 48 oras. "I went to the hospital where the chief justice is now confined in order to bring him before this court and continue to testify with direct and cross examination. Unluckily enough, when we reached the hospital, your honor, we did not have the opportunity to talk with the chief justice [because] he is in sedation and we were prohibited by the physicians in charge to have a conference with him," ani Cuevas. Sa kabila nito, iginiit ni Cuevas na babalik ang punong mahistrado upang ipagpatuloy ang kanyang testimonya. "But the stumbling block is his mental and physical condition... in fact he cannot stand up. He is gasping for breath and I don't think his conditon will warrant an intelligible examination," ani Cuevas. Inihayag ni Cuevas na ayon umano sa mga duktor ni Corona, maaari na siyang humarap muli sa korte sa darating na Lunes, ngunit hahayaan na lamang niya ang korte na magdesisyon. Ayon naman kay lead prosecutor Niel Tupas Jr., hindi na nila isasagawa ang cross examination kapag hindi sasa-ilalim ng direct examination ang punong mahistrado. Nauna nang inutusan ni Enrile ang mga duktor ng Senado na alamin ang tunay na kalagayan ng punong mahistrado. Inaasahang mag-ulat sa Senado ng mga duktor nito. "Baka naman talagang may sakit. Hindi ka naman pupunta sa ICU kung hindi naman malubha ang sakit mo. We still have to wait for the reason of the defense why the Chief Justice is not here. We have to wait for the medical bulletin on the condition of the chief justice," ani Sen. Estrada. — Amanda Fernandez /LBG, GMA News